Тудо Шернур районысо Кугу Мушко ялыште шочын-кушкын. 9 класс деч вара Оршанке педколледжыште шинчымашым поген. Специальностьым налмек, ик ий утла Шернурысо «Колокольчик» йочасадыште пашам ыштен. Кӱшыл образованийым Марий кугыжаныш университетыште налын. Кызыт Йошкар-Оласе «Успех» парикмахерскийыште парикмахер-универсаллан ышта.
– Альбина, ты аланышке кузе логалынат?
– Тиде направлений дене тунемаш йоча дене шинчыме годым Йошкар-Оласе технологический колледжысе кум тылзаш курсыш коштынам. Мастарлыкемже студент жапыште палдырнен. Тӱшкагудышто пырля илыше йолташ ӱдырем-влак иктаж мероприятийыш каяш ямдылалтмышт годым ӱпым чиялташ але пӱчкаш чӱчкыдын мый декем йодын толыт ыле. Парикмахерскийыш каяш окса лийын огыл. Причёскым ышташ тӱрлӧ йӧным шке кычалынна.
Выпускной кече вашеш ик студенткын кужу ӱпшым илыме пӧлемысе койко вуйысо вичкыж тоя гай кӱртньӧ ужашым тулеш ырыктен кудыртенна.
– Шот лектын?
– Мыланна пеш келшен. Чылт африканке гай койын.
– Кызытше чыла технологийым шотыш налын пашам ыштет?
– Тиддеч посна ок лий.
– Парикмахерскийыште икымше кечын кӧлан стрижкым ыштенат, шарнет?
– Клиент семын пелашем лийын. Тудо креслыште ракатланен веле шинчен. Мый пӱжалтмеш стрижкым ышташ тыршенам. Сай лийже манын, уэш-пачаш тӱредынам. Ӱпшым моткоч кӱчыкын кодымым ужмеке веле чарненам. Тӱҥалтыш сомыл кужун шуйнен гынат, мариемын тау шомакшылан моткоч тунам куаненам.
– Паша келша?
– Кумылын ыштем. Южгунам кӱшыл образованийже молан, парикмахерланат каяш лиешыс, маныт. Тыгай кутыркалымашым йоҥылышлан шотлем. Кеч-могай сомыл тыршымашым йодеш. Психологийымат палыман, технологийланат кугу тӱткышым ойырыман. Сай лектыш лийже манын, вебинарлашке ушнаш тыршем, интернетыште занятий-влакым ончем, тӱрлӧ журналыште возымым лудам.
– Йыргешке чурийвылышан ӱдыр, ӱдырамаш-влаклан могай стрижке келшен толеш?
– Самырык ийготан-шамычлан йожек але кӱчык чёлкым ыштет гын, утларак моторын кояш тӱҥалыт. Илалшырак — влаклан – ассиметрий, пикси.
– Рвезе-влак кузе тӱредыктат?
– Фейд, андеркат стрижке-влак модный улыт. Шукын кужу чёлкым кодаш йодыт. Мелированийым ыштыктат, чиялтыктат. Южо спортивный причёскым йӧрата.
– Чӱчкыдын чиялтыме дене ӱп локтылалтеш?
– Ӧпке мутым мӧҥгыштӧ шулдо чиям кучылтмо деч вара ойлат. Шке моторлыклан оксам чаманыман огыл. Ме пашаште сай качестван, профессиональный сатум кучылтына.
Ӱп кӱрыштеш але йога гын, тудым эмлаш кӱлеш. Келшыше шампунь дене мушман, маскым ыштыман, бальзамым налман. Эмлыме шотышто специалист-влак деч ой-каҥашым йодман.
– 8 Март вашеш ӱдырамаш-влаклан могай тыланымашет лиеш?
– Уло кумылын тиде пайрем дене саламлем. Чыла ава-шамычлан пеҥгыде тазалыкым тыланем. Ӱдырамаш-влак чонышт денат, тӱжвал тӱс денат йӧратыме пӧръеҥышт пелен эре мотор лийышт.
Альбинан усталыкшым ужын, тудын деке причёскым ышташ ятырын коштыт. 2015 ийыште Йошкар-Олаште эртыше регион-влак кӱкшытан чемпионатыште «Эр-кас причёско» номинацийыште сеҥышыш лектын да диплом дене палемдалтын. Шушаш пайрем дене тудым меат саламлена да пашаштыже эреак чолгалыкым, кугу кӱкшытым тыланена.
Зоя Тимофеева.