Е.Ю.Новосёлова Козьмодемьянскысе художественный школышто сӱретлаш тунемын. А вара тӱрлӧ кидпашалан кумылаҥын. Шкеж нерген декоративно-прикладной творчествын мастерже улам мане.
18 ияш улмыж годымак Елена Юрьевна шер гыч картине-влакым ыштылын. Ик жап гыч тасма дене картиным сӧрастараш кумылаҥын. А кызыт тудо пушкыдо модыш-влакым пидеш. Кум уныкаже уло. Ала нунымат ончен, кумылжо модыш деке савыралын.
– Мый шуко ончерыште, конкурсышто шке пашамым ончыктем. Мӧҥгыштем тауштымо кагаз ден грамот ик пырдыжым авалта. Ынде шым ий модышым пидам. Ондакше тӱрленам, юмоҥам шер дене ыштылынам. Иктаж 80 тыгай картине ыле. Варажым вес сомыллан пижым. Модыш-влакым плюш, велюр, чыла шотыштат йочалан келшен толшо материал гыч ыштылам. Икшыве-шамычлан келша. Иктаж-кушко пижыкташышт, сакалташышт лӱмынак оҥгым келыштарем. Кидпаша лыпландара, тӱрлӧ шоныш деч жаплан кораҥда. Тӱҥ шотышто кидпашам телым ыштем, а кеҥежым ужалем.
Е.Ю.Новосёлован кидпаша выставкыже Козьмодемьянск оласе чыла тоштерыште эртаралтын. Мастар еҥ реставратор семынат тырша. Икмыняр ий ончыч художник Илья Репинын «Бурлаки на Волге» картиныжым ик еҥлан уэмден пуэн. Чын, Юл эҥер тыште илыше-шамычлан путырак лишыл. Сандене туддене кылдалтше неле пашам Елена Юрьевналан сӧрал эҥерын вий-куатшат ыштен полшен дыр.
Тылеч посна Елена Юрьевна Козьмодемьянскыште Тихвин черкылан полша. Тушко модышыжо-влакым намиен кода, а ужалыме оксаже черкыште чоҥымо-тӧрлатыме пашалан кая. Кидпашам ужалыме оксам мастар ӱдырамаш спецоперацийлан надыр семынат пуэден. А сирень да ал тӱсан черепахыжым мыланем сумкашкем пижыктыш да «Пиалан лий» манын тыланыш.
Эльвира Терентьева.
Авторын фотожо-влак.
