Пошкырт кундем Калтаса район Келтей ялыште шочын-кушшо Дарья Линючева «ChEVER» бренд дене шке ыштыме марий вургемжым маркетплейсыште ужалаш тӱҥалын.
Изинек марий тӱвыралан шӱман
Ӱдыр верысе школышто шинчымашым погымыж годымак марий йылмылан да тӱвыралан шӱман кушкын. Марий йылме да литератур дене республикысе, регион-влак кокласе олимпиадылаште чӱчкыдын уш-акылжым терген. Школ деч вара М.Акмулла лӱмеш Башкирийысе кугыжаныш педагогический институтыш англичан йылмым туныктышылан тунемаш пурен. Дипломым налмеке, шочмо школышкыжо икшыве-влакым туныкташ толын. Кызыт Келтей школышто англичан йылмым туныкта.
– Ешыштына марий тӱвыралан кугу тӱткыш ойыралтын. Ачана ден авана илымышт годым мыланна, ныл икшывыштлан, шке калыкнан йылмыже, тӱвыраже, йӱлаже дене кугешнаш кӱлмӧ нерген эре туныктен ойленыт. Шочмо калыкнан поянлыкше дене йывыртымаш тачат пашаштем полшен шога, – ойла Дарья.
Ӱдырын аваже Эльвира Сабанаевна уста кид-йолан ӱдырамаш лийын. Тудо моткоч чаткан тӱрым тӱрлен. Сӧрастарышыже-влак пӧртлан шкешотан ямым пуртеныт, кажне гаяк лук марий тӱр дене сылнештарыме лийын. Тылеч посна уста ӱдырамаш марий вургеман поян коллекцийым арален. Нуныжо ты ешыште тукым гыч тукымыш йӱлам жаплымашым да шуйымашым пеҥгыдемденыт. Ава ӱдыржымат тӱрым тӱрлаш туныктен, марий литературлан кумылаҥден. Садлан суртыштышт шочмо йылме дене ятыр книга аралалтын. Дарья марий йылме дене савыктыш-влакым куанен лудын. Тидыже калыкнан илышыже, ыштыш-кучышышо деке эшеат шӱмаҥден.
Шукертак шонен
– Шке бренд дене вургемым ышташ шукертак шоненам. Тидлан эркын-эркын ямдылалтынам. Тыгак маркетплейслаште кызытсе илышлан келыштаралтше марий вургемым ужмо шуын. Ала-молан гын моло калык-шамычын вургемыштым тушто ужаленыт, но марий вургемым иктат темлен огыл, – каласкала ӱдыр.
Тыге Линючева еҥын темлымыжым вучен шинчаш огыл, а ты сомылым шке кидыш налаш да илышыш пурташ пижын. Умылтарымыж почеш, «ChEVER» брендын лӱмжӧ – усталык пашан лектышыже. Ты мутышто «еver» мут уло, англичан йылме гыч тудо «курымеш але эрелан» манын кусаралтеш. Брендын лӱмжӧ «эре мотор» манмым ончыкта. А кокымшо буквам изи шрифт дене «курымеш» мутым лӱмын палемдаш возымо.
Кызыт Дарья Линючеван сатужо Ozon маркетплейсыште ужалалтеш. Тушто марий йылме дене возыман носким, футболкым налаш лиеш. Носкилаште кажне арнясе кечым возымо гын, футболкылаште «Мариечка», «Чевер» возыктыш-влак улыт. Лишыл жапыште уста ӱдыр лонгсливым да у моделян футболко-шамычым лукташ шона.
– Такшым шонымаш ятыр, но чыла тидым илышыш шыҥдараш шуко жап кӱлеш. Кызыт пӧръеҥ-шамычлан носким ышташ, лонгсливлан орнаментым келыштарыме шотышто шонкалем. Тӱҥ эҥертышем – Иван пелашем. Тыгак лишыл еҥем-влак полшат. Икте, мутлан, вургемым коробкаш опта, весе рекламылан вуйын шога, кумшо дизайнлан фотографийым келыштара. Икманаш, кажныже могай-гынат надырым пышта, садлан нунылан нимучашдымын тауштем, – манеш Линючева.
Фестивальыште палдара
Ӱдырын сатужым калык кузе вашлиеш манын, чонышто тургыжланымашым Дарья ок шылте. Тудын сатуж дене эрвелмарий-влакын регион-влак кокласе «Ший кандыра» фестивальыштыже лишкырак палыме лияш йӧн лиеш. Дарья тушто шке сатуж дене палдараш тӱҥалеш.
Ӱдырын ойлымыж почеш, носки ден футболкым фабрике гоч заказатла. Вургемым тудын темлымашыже да йодмашыже почеш ямдылат. Производствышт Нефтекамск олаште верланен. Дарья пелашыж дене тыште илат.
Каникул жапыште жап утларак лиймылан кӧра Дарья Линючева ты сомылым вораҥдарымашке вуйжыге пуреҥгайыме нерген палдарыш. Но вет лектышыжымат ужына. Тидыже кумылым поснак савыра. Ынде марий орнаментан вургемым кажне гаяк еҥ маркетплейсыште заказатлен да пайдаланен кертеш. А Дарья деч эше шуко у коллекций-влакым вучаш тӱҥалына. Пашат ушныжо, марий ӱдыр!
Еш альбом гыч налме фото-влак.