МарГУ-со Национальный тӱвыра да тӱвыра кокласе коммуникаций институтышто кокымшо курсышто тунемше Анна Иванова («Финно-угрий студенчествын миссше – 2025» XII тӱнямбал конкурсышто кокымшо вице-миссше) «Сурская красавица» лӱм верч таҥасаш тӱҥалеш.
Моторлыкым, уш-акылым да усталыкым тергыше ты конкурс 27-31 октябрьыште Пенза оласе кугыжаныш университетыште эрта. Эн тӱҥ короным налшаш верч Пенза, Саранск да Йошкар-Ола гыч 10 ӱдыр таҥаса. Нунылан вич этапым эртыман: национальный да тыглай тувыр дене дефиле, еш йӱла дене палдарымаш да усталык номер-влак. Конкурс программыште тыгак – тематический фотосессий, тӱрлӧ мастер-класс, тӱвыра да туныктымо мероприятий-влак да молат. Финал 31 октябрьыште лиеш.
Анна изинек кушташ йӧрата, Марий самырык театрыште профессионально кушта. МарГУ-со студактивын еҥже. Университетысе усталык фестиваль-шамычлан хореографий номер-влакым шында.
МарГУ-н сайтше гыч налме фото.