Моркышто — «Зарничке»

Морко поселкысо 2-шо номеран школын спорт площадкыштыже «Зарничке» модыш эртен. Тушто районысо 13 школ гыч тунемше-влак команде дене таҥасеныт.

Участник-влакым Морко администраций вуйлатышын алмаштышыже А.Васильев, Кугу Отечественный сарын, Вооруженный Вийын да првоохранительный органын ветеран-влак советшын председательже Н.Мельников, Морко районын военный комиссарже И.Габдулхатов саламленыт.

Нунылан вийым, чолгалыкым, уш-акылым тергыман «Разведчик», «Сапер», «Снайпер» да моло оҥай лӱман чылаже индеш станцийым эрташ кӱлын. Сеҥышыш Купсола школын командыже (вуйлатыше — Ю.Н.Романов). лектын, кокымшо да кумшо верым Морко поселкысо 6-шо (вуйлатыше — А.Л.Пауткин) да 2-шо номеран (вуйлатыше — В.В.Иванов) школ-влак налыныт. Сеҥыше-влак медальым, кубокым налыныт, а участник-влак – грамотым. Модышым райрӱдысӧ Юмын кончымо черке дене пырля «Йоча усталык рӱдер», «Моркысо физический культур да спорт рӱдер» пашаеҥ-влак эртареныт.

Модмаш мучашлалтмеке, чыланыштымат Морко поселкысо Юмын кончымо лӱмеш черкын настоятельже протоиерей Леонтий саламлен, тауштен ойлен.

Йоча-влакым военно-патриотический шӱлышеш шуараш полшышо модышым игече йӱштӧ шогымылан кӧра Отечествым аралыше-влакын кечышт вашеш огыл, а март тӱҥалтыште гына эртарен кертме. Модмаш князь Александр Невскийын шочмыжлан 800 ий теммылан пӧлеклалтын.

Лариса Ксенофонтова, Морко рушарня школын педагогшо.