Шукерте огыл Марий Элым Вуйлатыше Юрий Зайцев Йошкар-Оласе Самырык-влаклан полатыште #МЫВМЕСТЕ тӱнямбал премийын регионысо этапшын сеҥышыже-влакым саламлен. Призёр-влак радамыш Коркатово лицейын тунемшыже Елизавета Пауль логалын. Лиза – «Морко шӱшпык» волонтёр отрядын чолга еҥже.
Ветеран-влакым шарныман
Е.Пауль Коркатово лицейыште 11-ше гуманитарный да правовой кадет классыште тунемеш. Изинек поро ӱдыр кушкын. 9-ше классыште тунеммыж годым «Морко шӱшпык» волонтёр отрядыш пурен, тыгак доброволец-влакын Добро.ру платформыштыжо регистрацийым эртен. Тылеч вара тӱрлӧ форумышко, порылыкым ончыктымо акцийышке эшеат чӱчкыдын ушнаш тӱҥалын. Лиза, ончыкылык тукым Кугу Отечественный сарын ветеранже-влакым шарнышт манын, тӱрлӧ проектым воза. Иктыже, «Памяти павших, во имя живых» проектше, тений #МЫВМЕСТЕ премийын регионысо этапыштыже 16 эн сай проект радамыш логалын.
– Пашамым Кокласолаште Кугу Ачамланде сарыште вуйым пыштыше ветеран-влаклан памятникын социокультурный рӱдер семын кӱлешлыкшым аралыме шонымаш дене возенам. Кажне Воин чап кечын памятник деке пеледыш аршашым пыштена. Лач ты памятник воктене элнан ик эн кугу пайремжым – Сеҥымаш кечым – палемдена, – манеш волонтёр.
Поро пашам ыштен, тӱня тӱзлана
Чолга ӱдыр «Большая перемена» конкурсын полуфиналышкыже кок ий почела логалын. Тудо Пермьыште да Саранскыште лийын.
– «Морко шӱшпык» волонтёр отряд дене тӱрлӧ поро пашам шуктена. Шоҥгыеҥ-влаклан кочкыш сатум кондена, нунын дене чон почын мутланена. Идалык мучко Ойганыше ава да эрге памятник воктене кумдыкым эрыктена. СВО кайыме верыш гуманитарный полышым погена, маскироватлалтме сеткым пидына, поро тыланымашан серышым возена.
Ӱдыр-рвезе-влакым школышто поро туныктышо-влак виктарен шогат. Мыйын класс вуйлатышем, тудо тыгак мемнан волонтёр отрядын вуйлатышыже, Валентина Николаевна Васильевалан, кугу тау. Валентина Николаевна тунемшыже-влаклан – поро да мунло наставник. Арам огыл тений #МЫВМЕСТЕ конкурсын эксперт комиссийже тудлан «Идалыкысе наставник» лӱмым пуэн, – ойла Е.Пауль.
Лиза кызыт выпускной классыште шинчымашым пога. Озаҥ оласе федеральный университетыш гуманитарный направлений почеш тунемаш пурынеже. Тидлан кызыт кыртмен ямдылалтеш. Ончыкшым вузыштат волонтёр пашам шуктынеже. Вет порылык тӱням тӱзата да утара.
Еш альбом гыч налме фото.