12 февраль – Росгвардий системыш пурышо лицензионно-разрешительный паша да частный охранный пашам тергыше подразделенийым ыштыме кече.
Российыште оружийым кучылтмо шотышто законым шуктымым кугыжаныш могырым тергыме пашам Росгвардий системыш пурышо лицензионно-разрешительный паша шотышто подразделенийлан ӱшаныме. Тудо тыгак частный охранный да частный детективный пашам тергымылан вуйын шога. Росгвардийын Марий Элысе управленийжын Лицензионно-разрешительный паша шотышто рӱдержым полиций полковник В.А.Шуралев вуйлата. Виктор Алексеевич ты рӱдерын пашаже дене палдара да икмыняр йодышлан вашмутым пуа.
Правилым пудыртет – поген налыт
Ты рӱдер еҥ-влакын собственностьыштышт шотлалтше оружий дене пайдаланымым веле огыл, тыгак кугыжаныш огыл охранный структур ден ведомственный охранын подразделенийже-влакым, оружий ден патрон-влакым ужалыше предприятийлам, частный детективный да охранный пашам терга.
Марий Элыште 6 подразделений пашам ышта: Лицензионно-разрешительный паша шотышто рӱдер, тудын Йошкар-Оласе пӧлкаже да районласе эше 4 пӧлка.
Лицензионно-разрешительный паша шотышто подразделений-влак гражданский оружийын 10274 озашт (нунын ӱмбалне 17960 оружий шотлалтеш) шотышто терга.
Ӱмаште Лицензионно-разрешительный паша шотышто рӱдерыште 7350 кугыжаныш услугым пуымо, тушеч 7176-шо – электронный йӧн дене (Кугыжаныш услуго портал гоч).
2024 ийыште ОВД пашаеҥ-шамыч дене пырля еҥ-влакын оружий ден патроныштым аралыме условийыштым 2963 гана тергыме. 4210 разрешительный документым пуымо. 101 нарушений шотышто еҥ-влакым административно мут кучаш шогалтыме, 249 оружийым да 3099 патроным поген налме.
Еҥ-влак шукыж годым оружий шотышто перерегистраций, тудым аралыме условий дене кылдалтше правил-влакым пудыртат. Оружийым поген налме профилактический мерылан шотлалтеш – оружийым йомдарыме але шолыштмо, тудын дене пайдаланыме годым правам пудыртымо случай-влакым шагалемдыме амал дене тидым ыштат. Ӱмаште, мутлан, оружийым озаж деч поген налме 249 случайым регистрироватлыме.
Шке кумылын
Росгвардийын Марий Элысе управленийжын темлымыж почеш, оружийым шке кумылын сдатлымылан ӱмаште шукырак оксам тӱлаш тӱҥалыныт.
Оружийым, тудын тӱҥ ужашыже-влакым, боевой припасым да пудешталтше веществам оксала сдатлаш кумылан еҥ Росгвардийын лицензионно-разрешительный паша подразделенийышкыже але элгӧргӧ паша органлаш (илыме верлан келшышын) кайышаш. Сдатлыме оружийым кучылтмо дене нимогай преступленийым ыштыме огыл гын, тудын ончычсо озажым административно да уголовно мут кучаш огыт шогалте. 2024 ийыште еҥ-влак 23 огнестрельный оружийым да тудлан 273 боеприпасым сдатленыт. Нунылан тӱлымӧ чумыр окса 69 тӱжем теҥгеш шуын.
СВО-ш колташ
Закон почеш, сонарлаш коштыктымо гладкоствольный пычалым Россий Обороно министерствын СВО-што улшо подразделенийлаш колташ лиеш. Марий Элыштат тидым Росгвардийын регионысо управленийжын лицензионно-разрешительный паша шотышто подразделенийже гоч ышташ йӧн уло.
Шке оружийым СВО участник-шамычлан колташ шонышо еҥлан илыме верже почеш Росгвардийын пӧлкашкыже мийыман, тушто кӱлеш документым оформитлаш полшат, данный-влак базыште тергат да, договор ден актым подписатлымеке, оружийым учёт гыч кораҥдат. Ӱмаште Марий Элыште илыше-шамыч военнослужащий-влаклан 60 оружийым да 1400 патроным колтеныт. Передовойышто тушман ваштареш шогаш полшышо да сай состояниян оружийым кондыман. Гладкоствольный пычал ден 12 калибран нарезной длинноствольный пычал тушманын беспилотникше-влак ваштареш кучедалмаште сайын полшат.
Шке оружийым СВО-ш колтышо еҥ-шамычым варажым оружийым кучылтмо шотышто икмыняр правам административно пудыртымылан (мутлан, регистрацийым але перерегистрацийым вараш эртымылан) мут кучаш огыт шогалте.
Лицензийым налаш мом ыштыман?
Тидлан Госуслуги порталыш пурен, «Получение лицензии на оружие» кнопкым гына темдалман. Тылеч вара медицинский тергымашым эртыман, вӱрым да шондым наркотик уло але укелан тергат, коммерческий огыл организацийыште тунеммашым эртыман, тушто оружиян еҥ мом палышаш, ойлат. Кугыжаныш пошлиным тӱлымеке, кӱлеш документ дене Лицензионно-разрешительный паша шотышто рӱдерыш кайыман. Тушто ФСБ-ште да МВД-ште учётышто шогымылан тергат. Общественный порядкым пудыртышо да моло неле преступленийым ыштыше еҥлан лицензийым огыт пу.
Кузе аралыман?
Оружий поснак кугу лӱдыкшым конден кертше арверлан шотлалтеш. Тудым сайын тӱкылалтше сейфыште гына аралыман. Сравоч икте гына лийшаш, оружийын кушто кийымыжым озаже веле палышаш. Ик вер гыч весыш кондыштарыме годым оружийым (патрон деч посна) рончыман да чехолыш вераҥдыман. Кӱлеш верыш мийымеке, уэш сейфыш вераҥдыман да тӱкылен налман.
Лицензионно-разрешительный паша шотышто рӱдерын пашаеҥже-влак еҥ-шамычын оружийым аралымыштым вич ийлан ик гана тергат. Сонарлыме сезон тӱҥалме годым рейдовый мероприятийлаш лектыт.
Сонарзе-влаклан
Сонарлымаш хоббилан, чоным куандарыше сомыллан шотлалтеш. Чаманен каласыман, кажне ийын сонарзе-влакын оружий дене пайдаланымышт годым правилым пудыртымым регистрироватлат. А правилым пудыртымаш туткар мартеат шуктен кертеш. Садлан сонарзе-шамыч чонлан келшыше сомылым шуктымышт годымат ответственность нерген мондышаш огытыл.
Лицензионно-разрешительный паша шотышто рӱдер кажне шочмын да изарнян приём кечым эртара. Йошкар-Ола, Тихомирова урем, 58-ше №-ан пӧрт адрес дене миен, лекше йодышым рашемдаш лиеш.
Росгвардийын Марий Элысе управленийжын архивше гыч налме фото-влак.