Ноябрьын пытартыш рушарнянже Ава-влакын кечышт палемдалтын. Ты кече вашеш ятыр мероприятий, акций, флешмоб эртаралтын. Шернур посёлкысо 1-ше номеран школын 4 «А» классыштыже тунемше ӱдыр-рвезе-шамыч туныктышышт Е.Л.Иванова дене пырля мотор пырдыжгазетым ямдыленыт да чинчышудо пеледышан открыткым ыштеныт.
Екатерина Леонидовна ты школышто шукерте огыл пашам ышта. Шушаш ийын самырык туныктышо икымше выпускым луктеш. Ты профессийыш кузе толмыжо нерген тыгерак каласкалыш:
– Туныктышын профессийжым изи годсек йӧратенам. Шарнем, школ деч варат туныктышыла чӱчкыдын модам ыле. Школышто мом пален налмем шке йырем поген шындыме модыш-влаклан каласкаленам, пуйто нунылан ала-могай шинчымашым пуаш тыршенам. Варажым, чонлан лишыл профессийым налаш манын, Марий кугыжаныш университетын Калыкле тӱвыра да тӱвыра кокласе коммуникаций институтыш марий йылмым да литературым туныктышылан тунемаш пуренам. Тунам тӱҥалтыш класслам туныкташ тӱҥалам манын, шоненат омыл, но чылажат кӱчык жапыште вашталтын. Изи ӱдыр-рвезе-шамыч дене пашам ыштен керташ манын, ешартыш шинчымашым налынам. Школышто нылымше ий пашам ыштем. Тений икымше квалификациян категорийым налынам.
Екатерина Леонидовна ойлымыж почеш, изи йоча-влак дене икшыве семынак койман. Садлан туныктышо урокым эртарымыж годым модыш, информационно-коммуникативный да проблеме-влакым решатлаш полшышо тунемме йӧн-влаклан эҥерта. Тыгак урок жапыште ятыр пашам ыштен шуктыман, манеш. Йоча-влаклан у шинчымашым пуыман, ончычсо материалым пеҥгыдемдыман, теорийым практикыште кучылташ туныктыман.
– Кызытсе ӱдыр-рвезе-влак писе, чолга, виян кушкыт. Ойлат вет, кажне тукымын, шке икшывыже, санденак нуно икте-весышт деч ойыртемалтыт. Кызытсе икшыве-шамыч шке гыч шукылан тунемыт. Туге гынат туныктышым сай йолташлан шотлат. Тидыже тунемше ден туныктышо кокласе кылым вияҥдаш полша, – мане туныктышо.
Самырык специалистлан у коллективыште кузерак пашам ышташ йодым. Вет кеч-могай сомылым тӱҥалме годым тӱрлӧ нелылык лектеш. Вашмут тыгайрак лие:
– Чынжымак, кеч-могай пашаштат, очыни, коллектив деч шуко шога. Тидын шотышто шкемым пиалан айдемылан шотлем. Школышто мыйым моткоч сайын вашлийыныт. Полышым йодын мийыме годым эреак умылтараш тыршеныт. Ты але тудо сомылым кузе вораҥдарыме шотышто туныктеныт. Шке сомылыштым ятыр ий виктарыше, опытан специалист-влак дене пашам ышташ куштылго да пайдале. Тыге ме, самырык туныктышо-влак, вияҥына да ончыко каена.
Кеч-куштат самырык еҥ ончыкылыклан ӱшаным шочыкта. Лийже тиде туныктымо але вес алан. Тӱҥжӧ – специалистлан профессийже келшыже. Екатерина Леонидовна – шке верыштыже, чонлан келшыше сомылым шукта. Тугеже тунемше-шамыч ӱшанле кидыште улыт!
Е.Иванован альбомжо гыч налме фото-влак.