Кодшо кечылаште МарГУ-н «Воскресение» кычалше отрядшын боецше-влак ондак мумо пытартыш медальоным пӧртылтеныт.
РФ Обороно министерствысе рӱдӧ архивын данныйже почеш, Сергей Андреев Морко район Изи Кожлаял ялеш 1909 ийыште шочын. Тудо 1940 ий июльышто Морко районысо военный комиссариатын повесткыж почеш армийыш каен. 1942 ий сентябрь годсек увер деч посна йомшылан шотлалтын.
Тений 12 мартыште МарГУ-што С.В.Андреевын медальонжым Морко район Волаксола школышко пуымо шотышто торжественный мероприятий лийын.
Новгород кундемыште сар годым ятыр еҥым тӱшкан пуштедыме нерген пале. Тышан вуйым пыштыше-влакым кызытат кычалыт да Шочмо эл верч кредалше-влакын тӱрлӧ арверыштым муыт. Тидыже салтак-влакын кушан вуйым пыштымыштым рашемдаш полша.
Волаксола школ директор В.В.Николаевын мутшо почеш, салтакын родо-тукымжым Изи Кожлаял ялыште мумо огыл, сандене медальоным школлан пуымо. Ты кечылаште рашемдыме: Сергей Васильевичын Валентина ӱдыржӧ Вончыдӱр ялыште ила, а уныкаже Купсола школышто туныкта. Лишыл жапыште, очыни, 9 Май пайремлан, ты медальоным родо-тукымжылан кучыкташ шонат.