25-28 июньышто Италийыште греко-римский кучедалмаш дене 16 ияш марте спортсмен-шамыч коклаште Европын первенствыже лийын. Марий Элысе спортивный кучедалмаш дене спортшколын воспитанникше Матвей Колениченко 52 килограмм нелытан-влак коклаште шӧртньӧ медальым налын. Юрий Рожин 68 килограмм нелытан-влак коклаште визымше лийын.
Кеч-могай спортсменлан шӧртньӧ медальым сулаш шуко пӱжвӱдым йоктараш логалеш. Тудын акшым нунак веле палат. Теве, Европысо таҥасымашыш логалаш манын, 14 ияш Матвейлан мыняр пашам ышташ кӱлын…
Волжский район Памар селаште илыше М.Колениченко кажне кечын Волжск олашке автобус дене тренировкыш кудалыштеш. Тушто тудо кок шагатат пеле кыртмен тренироватлалтеш. Рвезе дене спортыш толмо корныжо да эртыше кугу таҥасымаш нерген мутланышна. Тудо тыгерак каласкалыш:
– Греко-римский кучедалмаш дене куд ийым темымеке заниматлаш тӱҥалынам. Тидлан кугурак Сёма изамым ончен кумылаҥынам. Тудо спортын ты видыштыже спорт мастерлан кандидатыш нормативым шуктен. Тренерем – Александр Григорьевич Серяков.
Мый чӱчкыдын тӱрлӧ кӱкшытан таҥасымашлаште вием тергем. Шарнем, икымше кугу стартыш Архангельск олашке миенам ыле. Тунам чонышто каласен моштыдымо шижмаш озаланен. Латик ийым темымеке, греко-римский кучедалмаш дене Марий Элын сборный командышкыже логалынам. Тунамак кундемнан чапшым Юл кундем федеральный округысо (ПФО) таҥасымашыште араленам. Тушто мый икымше лийынам. Тыге мыйым ПФО-со сборный командыш ойыреныт.
Палемдыман, тылеч вара Матвей ПФО-н таҥасымашыштыже кум ий почела сеҥен. Землякна шке нелытан-влак коклаштыже лидерствым кучен. Тений 14 ийым темыше рвезе Российысе таҥасымашыште икымше лийын да элнан сборный командышкыже ойыралтын.
Европысо таҥасымаш деч ончыч Российын сборный командыжын спортсменже-влак Моско воктенысе Княжьи Дали спортбазыштыже сборым эртеныт. Тушто нуно технически, психологически, физически стартлан ямдылалтыныт.
– Европын первенствыже моткоч сайын эртен. Мыланем чылажат келшен. Тушко мый лач ик шонымаш дене каенам – сеҥаш! Российын сборныйжо ты старт гыч кум шӧртньӧ, ик ший, ныл той медаль дене пӧртылын.
Ача-авам да йолташем-влак таҥасымашым вияш эфир йӧн дене онченыт, садлан нуно кажне татыште мо ышталтмым паленыт. Сеҥымемлан алят ом ӱшане, садлан чоныштем кызыт мо ышталтмым каласашат огеш лий, – чонжым почо чемпион.
Тыгай еҥ-влак дене кунам от куане?! Землякнан кугу стартыште икымше улмыжо, очыни, мыйыным веле огыл, кажне еҥын чоныштыжо кугешнымашым ылыжтен. Содыки спорт самырык тукымым куштымаште кугун полша. Колениченко шкежат тидым пеҥгыдемда. Тудо ойла:
– Борецлан сай лектышыш шуаш техникым сайын палыме деч посна пеҥгыде койыш-шоктышан да физически виян лийман. Но эн тӱҥжӧ содыки характер да чытыш кӱлыт.
Матвей Колениченкон пеҥгыде койыш-шоктышан, чытышан, пашам йӧратымашан улмыжо кугу сеҥымашке шуаш полшен. Дисциплиным шуктымаш, шонымашке шуаш тыршымаш теве кушто спортменын секретше. Землякнан дене кугешнена да у сеҥымаш-влакым тыланена!
М.Колениченкон альбомжо гыч налме фото.