Мастарлыкым акленыт

2-3 октябрьыште Марий Эл Республикыште инвалид-влакын профессиональный мастарлыкыштым тергыше «Абилимпикс» III региональный чемпионат лийын. Тудо начар тазалыкан еҥ-влакым пашам ышташ утыр таратыме да республикыште инлюзивный профессиональный образованийлан полшымо шот дене эртаралтын.

Чемпионатыште 116 конкурсант коклаште 20 тунемше, 52 студент, 44 специалист, тышеч 27 еҥже республикысе сокыр, соҥгыра да инвалид-влакын обществышт гыч лийыныт, тыгак 9 еҥ психоневрологический интернатыште ила. Нунын пашаштым 85 эксперт аклен. Чыла мероприятийыште 65 волонтёр инвалид-влаклан полшен шоген.

Тушто школышто, вузышто тунемше ден специалист-влак посна выступатленыт. Нунын пашаштым 16 компетенцийыште тергыме. Тиде –   «Бисероплетение», «Вязание крючком», «Вязание спицами», «Художественное вышивание», «Кирпичная кладка», «Резьба по дереву», «Ремонт обуви», «Швея», «Администрирование баз данных», «Изобразительное искусство», «Предпринимательство», «Сборка/разборка электронного оборудования», «Робототехника», «Экономика и бухгалтерский учет», «Сетевое и системное администрирование», «Массажист».

Тиде шкешотан таҥасымаш Марий политехнический техникумышто, строительно-промышленный техникумышто, Йошкар-Оласе технологический колледжыште да Йошкар-Оласе медицинский колледжыште эртаралтын.

Чемпионат годымак профессиональный ориентаций шотышто межведомственный заседаний, инвалид-влакын образований да социализацийышт нерген «йыргешке ӱстел», интерактивный лекций ден семинар-влак лийыныт, презентаций площадке ден мастер-класс-влак пашам ыштеныт.

Тунемше-влаклан профессийым ойырен налаш чемпионатысе чыла компетенций дене мастер-класс да шкем тӱрлӧ специалист семын терген ончаш йӧн лийыныт. Йошкар-Оласе Калыклан паша верым ситарыме шотышто рӱдерын пашаеҥже-влак начар тазалыкан йоча ден студент-шамычлан профессий-влак шотышто тестированийым эртареныт.

Чемпионатыште сеҥыше-влакым Марий политехнический техникумышто саламленыт. Сеҥыше да призовой верыш лекше 57 еҥлан дипломым, той, ший да шӧртньӧ медаль-влакым да шергакан пӧлекым кучыктеныт. Ынде сеҥыше-влак 20-23 ноябрьыште Москошто «Абилимпикс» V национальный чемпионатыште Марий Элын чапшым аралышаш улыт.

«Массажист» номинацийыште 33 ияш Татьяна Собянина сеҥен. Тудо У Торъял район Элембай ялеш кушшо да варажым Савинысе школ-интернатыште тунемын. 2005-2008 ийлаште Татьяна Ульяновскысо фармацевтический колледжыште массаж шотышто медсестралан тунем лектын. Вара кум тылзе Волокаламск олаште сокыр-влаклан реабилитаций рӱдерыште торчак дене кошташ тунемын, компьютерыште кутырымо программым пален налын. Тылеч посна кочкаш шолташ да моло сомылым шукташ туныктеныт.

2009 ий мартыште Т.Собянина «Южный» санаторийыште пашам ышташ тӱҥалын. Ик ият пеле гыч тудо декретный отпускыш каен. Ӱдыржым йрчасадыш колтымеке, ятыр жап пашам кычалын. 2013 ий 30 сентябрьыште Татьянам «Сосновый бор» санаторийыш уло кумылын налыныт. Ты годсек тыште пашам ышта. Кызыт кум массажист уло, коктынжо пӧръеҥ улыт. Кечеш кажныже 20 еҥлан массажым ышта.

А Медведевысе «Знак равенства» молодёжный клубын участницыже Людмила Щербакова «Художественное вышивание» номинацийыште 1-ше верым налын. «Тыгай конкурсышто икымше гана шкемым тергенам. Мӧҥгыштӧ шыпыште, шкетын тӱрлаш – тиде ик паша. А кунам пашам шуктымо годым ӱмбакет тынар еҥ онча, моткоч тургыжланет улмаш», – каласыш Людмила. Ты самырык ӱдыр-влак моло 13 сеҥышылан Москошто шке мастарлыкыштым почын пуымаште чолга лияш тыланена.