Морко район ӱдыр Регина Григорьева 9-ше классыш вончен. Тудо – Морко посёлкысо 2-шо №-ан школын тунемшыже. Регина изинек усталык шӱлышан кушкеш. Марий сылнымутым йӧрата.
Тений ӱдыр апрельыште эртаралтше «Ший талешке» республикысе шымлыме паша-влак конференцийыште участвоватлен. Тудо тунемше кугезе кочаже Семён Николаевич Майков нерген каласкален. Пытартышлан СВО дене кылдалтше шке возымо почеламутшым сылнын лудын пуэн. Жюрин еҥже Марий Эл Республикысе тӱвыран сулло пашаеҥже А.Клёнов ӱдырлан ончыкшым артисткылан тунемаш пураш темлен.
– Икымше почеламутем кок ий ончыч возенам. Тудо ялысе пырыс нерген лийын. Мутсаскам «Ямде лий» газетыштат савыкталтын. Марий поэзийым йӧратем. Колумб, Чавайн, Казаков лудмашлаште мастарлыкем ончыкташ тыршем, – ойла Р.Григорьева.
Регина кыртмен тунемеш. Руш йылме, марий йылме предмет-влакым поснак чот йӧрата.
Еш альбом гыч налме фото.