Интернет лаштыкым шергал шинчымем годым палыме ӱдырын вес элыште улмо фотожым ужым. Ӱдыр ик тылзылан Турцийыш илаш куснен улмаш.
Анна Сергеева Волжский район Пӧртанур ялыште шочын-кушкын. 15 ияшыж марте Памар селасе школышто тунемын, вара Медведево район Руэм посёлкысо шуко профилян лицей-интернатыш тунемаш куснен.
Школ пагыт годсек ӱдыр чолга койышыж дене ойыртемалтын. Шуко конкурслаште шке вийжым терген. Сандене тудым «лицеист ушемыш» пуртеныт. Тыгак Аня изиж годсек книгам лудаш йӧрата. Тидым ме соцсетьыштыжат ужына.
– Лицейым тунем пытарымеке, МарГУ-шко биологлан тунемаш пуренам. Биологий мыланем чот келша, кеч южо предметше пеш оҥай лийын огытыл гынат. Диплом пашамым икымше кугу сеҥымашлан шотлем. Мый йогылыкем сеҥен кертынам, – ойла А.Сергеева.
Аня студент годымак политикым шымлаш тӱҥалын. «Справедливый Россий» партийын самырык толкынжым вияҥден. Тунамак официанткылан, отельыште администраторлан пашам ыштен.
– Университетым тунем пытарымеке, налме профессий дене пашам муаш да илен лекташ неле манын умыленам. Пачерым айлен илаш 12- 15 тÿжем теҥге кÿлеш, а биологын пашадарже – 11500 теҥге. Сандене IT-аланыш проект-менеджерлан пашам ышташ каенам. Мыйын сомылем: проектым шуктымылан вуйын шогаш. Командын пашажым эскераш, ыштен шуктымо жапым тергаш. Паша куштылго огыл, но оҥай, – ойла ӱдыр.
«Турцийыш кузе логалында?» йодмемлан самырык специалист тыге вашештыш:
– Шоныде логалынна манаш огеш лий. Мемнан пашаште «смена обстановки» манме умылымаш уке. А тидыже шуктымо сомылым ужмышудымашке шуктен кертеш. Сандене качымарием дене ик жап Россий деч ӧрдыжтӧ илаш кутырен келшышна. Вер шотышто ятыр жап шонкаленна. Адакшым ме COVID-19 черын показательже изи лийже манын онченна. Тыге ме Турцийым ойыренна. Ондак ме Кемер туристический ужашыште иленна. Тушто верысе саскам шер теммеш кочкынна, а вара Стамбулыш каенна, – каласкалыш Анна.
Турцийыште 15 миллион еҥ ила, тидыже Моско ола деч утларак.
– Стамбул – колоритный да оҥай ола. Тудо Европа да Азий коклаште верланен, сандене тыште шуко калыкын тӱвыражым ужаш лиеш. Олан кажне лукшо шке ойыртемже дене сымыстара. А тӱҥ пешеходный уремышт – Истикляль – мыйын шонымаште, коштымо каштан дене ӱпша. Ак шот дене таҥастараш гын, Йошкар-Ола гаяк, манаш лиеш. Но тыште кафелаште да супермаркетлаште мемнан деч шулдырак. Вургемым тыште шулдо ак дене налаш лиеш. Тыште илыше калык поро чонан, весела кумылан. Турист-влаклан тыште куанат, сандене кажныже шке семын тидым акла. Икте ондален, шукырак оксам ыштынеже, весе – полшаш ямде. Мутлан, икымше кечын мемнам таксист 2000 теҥгелан ондален. Туге гынат мыланем тиде ола келша. Кас еда Босфорым ончен шинчаш йӧратем. Чайке-влак чоҥештылыт, пырыс-влак коштыт. Тыште пеш шуко пырыс уремыште ила. Ӱшанем, мый вес ганат тышке пӧртылам, – ойла Анна Сергеева.
Вес олаш илаш куснымо у илыш опытым пуа, вес шӧрын гыч илышым ончалаш полша. А IT-аланыште тыршыше еҥлан тиде моткоч кӱлешан, шонем. «Молодец, Аня!» манаш гына кодеш.
Фото ӱдырын альбомжо гыч.