Российыште перепись 2020 ийыште лийшаш ыле. Пандемийлан кӧра дате шӱкалалтын. Тудо тений 15 октябрьыште тӱҥалеш да 14 ноябрь марте, а элнан торасе да логалаш йӧндымӧ верлаштыже 20 декабрь марте шуйна.
Переписьын ойыртемже
14 октябрьыште Марий Эл Правительствыште Переписьым ямдылыме да эртарыме шотышто комиссийын черетан заседанийыштыже тӱрлӧ йодышым каҥашыме. Палемдыме: тӱҥ шотышто республикна тидлан ямде.
Маристатым вуйлатыше сомылым жаплан шуктышо И.П.Петрован мутшо почеш, тенийысе перепись пытартыш гана кагазыш возен да цифровой йӧн дене эртаралтеш. Бюллетеньысе йодыш-влаклан Интернетыште вашешташ лиеш. Госуслуго порталыште «Пройти перепись населения» сервис уло. Тусо переписный кагазысе йодыш-влаклан вашмутым 15 октябрь гыч 8 ноябрь марте шкевуя пуаш лиеш. Тиддеч вара QR-код пуалтеш. Тудым вара переписчиклан ончыктыман.
Кызыт Марий Элыште Госуслуго дене пайдаланыше 40630 еҥ пайдалана. Тидыже 14 ияш да тылеч кугурак еҥ-влак коклаште 8 процентыш шуэш. Тыгак образований тӧнежлаште, тазалыкым аралыме ден социальный аралтыш министерствылаште посна туныктымо еҥ-влак переписьым эртарат.
Тылеч посна переписьым эрташ шонышо-шамыч, стационарный участкыш але МФЦ-ш миен, переписьым эртен кертыт. Адрес-влакым Маристатын официальный сайтыштыже возымо. Но тудо ынде кагаз дене огыл, а планшет дене коштеш.
Кӧмыт, кушто…
Марий Элыште перепись дене кылдалтше пашам 238 контролёр ден 1426 переписчик шукташ тӱҥалыт. Нунын коклаште 49 студент уло. Тыгак резервыште профтехучилище ден техникумлаште тунемше 60 ӱдыр-рвезым резервыш возымо. Тылеч посна МФЦ-ште, стационар участкылаште волонтёр-влак полшаш тӱҥалыт. Кызытеш 206 волонтёрым регистрироватлыме да туныктымо. Тиде паша «Волонтёры переписи» программе почеш шукталтеш. Чылаштым судимость шотышто тергыме.
Переписьым эртараш 206 пӧлемым ойырымо. Нине мероприятий вашеш коронавирус инфекцийым чактарыме шотыштат ямдылалтме. Участкылаште температурым висат, социальный дистанцийым шотыш налыт. Черле да контактыште лийше еҥ-влаклан йодышым дистанционно пуат.
Тений январьлан Марий Элыште 675332 еҥ шотлалтын. Тидыже кодшо ийысе тыгаяк жап дене таҥастарымаште 4085 еҥлан шагалрак. А кызытсе сӱретым перепись рашемда.
Тӱрыс текст — «Кугарня» газетын 15 октябрьысе номерыштыже.