Марий Эл Республикыште илыше пагалыме еҥ-влак!
1990 ий 26 апрель гыч кажне ийын Марий Элыште Марий талешке кече кумдан палемдалтеш.
Тиде марий калыкын эн жаплыме пайремже. Тудо шочмо кундемнам утыр пагалаш, поян марий тӱвырам саклаш, акрет йӱлам шуктен шогаш, тыгак кугезе тукымым кечын шарнен илаш да жаплаш ӱжеш.
Марий калык ожнысекак Чумбылатым, Акпатырым, Полтышым, Мамич Бердейым, Акпарсым ик эн пагалыме талешке-влак семын шке чоныштыжо ашна да мланде марте нунылан вуйым сава. Калыкын да кундемнан эртыме корныштыжо нунын лӱмышт курымла вошт илаш тӱҥалыт. Тылеч посна Кугу Ачамланде сарыште Шочмо элнам аралыше да йӱдшӧ-кечыже тылыште тыршыше-влакым ме талешке семын жаплена да курымеш шарнаш тӱҥалына.
Марий калыкын ятыр шочшыж дене Марий Элыште веле огыл, моло кундемлаштат кугешнат да нуным талешкылан шотлат. Тиде радамыш марий сылнымутлан негызым пыштыше Сергей Чавайным, икымше марий профессиональный композитор Иван Ключников-Палантайым, лӱмлӧ драматург Яков Майоров-Шкетаным, «Путёвка в жизнь» кинофильмыште войзалтше актёр да поэт Йыван Кырлам, икымше марий шанчызе, мер пашаеҥ Валериан Васильевым, марий академик Василий Мосоловым, марий кокла гыч икымше Совет Ушем Герой Сергей Суворовым да молымат пурташ лиеш.
Марий Эл Республик Кугыжаныш Погын лӱм дене чыландамат уло кумылын тиде жаплыме марий пайрем дене саламлем да пеҥгыде тазалыкым, ваш умылымашым, ешыштыда пагалымашым, Марий кундемнам вияҥдыме поро пашаштыда сеҥымашым тыланем.
Марий Эл Республикын Кугыжаныш Погынжын Председательже А.В.Смирнов.