Тыге ойла Пошкырт кундем Мишкан район Чорай селан шочшыжо, МарГУ-н икымше курсын студенткыже Светлана Николкина.
Чолга, пӱсӧ уш-акылан да спортсменке ӱдыр
Света шочмо селасе Яныш Ялкайн лӱмеш марий гимназийым тунем пытарен. Школышто чолгалыкшым тӱрлӧ аланыште ончыктен. Чыла предмет дене «визытанлан» веле тунемын. Тӱҥалтыш класслаштак олимпиадылаште шинчымашыжым терген да сеҥыше, призёр радамыш эре логалын.
– Шымлаш йӧратыше ӱдыр улам. Сандене кажне предметым кумылын тунемынам. Тылеч посна шуко гана усталык конкурслаште участвоватленам. Ялкайн, Эмгак лудмашлаште марий поэзийым, прозым йӧратымем ончыктенам.
5-ше классыш вончымеке, куштылго атлетикылан шӱмаҥынам, волейбол, баскетбол командылаште модынам. Пытартыш кум ий марий йылме да литератур дене эн ончыч школысо, вара районысо да республикысе олимпиадыште сеҥышыш лектынам. Регион-влак кокласе этапыште кум ганажат призёр лийынам. Кугу тау марий йылмым туныктышем Анжелика Леонидовна Юзукбаевалан, – палдарыш отличнице Света.
С.Николкина марий литературым чот йӧрата. Яныш Ялкайнын «Андрий Толкын» повестьше чоныштыжо кугу кышам коден.
– Повесть автобиографий сынан, сандене тудым лудаш поснак оҥай. Произведенийыште шочмо Чорай ялем нергенат возымо. Повестьыште ончыктымо сӱретым кызытсе селам дене таҥастарем. Урем дене ошкылшемла, произведений гыч ужаш-влак ушыш пурат, – ойла Светлана.
Йылмылан йомаш огына пу!
Марий ӱдыр гимназий деч вара МарГУ-со Калык культур да тӱвыра кокласе кыл институтыш марий йылме ден литературым да англичан йылмым туныктышылан тунемаш пурен.
– Специальностьым ойырен налмаште шкемын чоным колыштынам. Мыланем марий йылме предмет эре куштылгыла чучын. Адакшым кызыт самырык тукым марла шагалын мутлана. Тыге, илен толын, йылме йоммо лӱдыкшӧ уло. Сандене мый тиде нелылыкым кораҥдымашке кеч изи гынат надырым пыштынем. Кызытсе тукым огыл гын, кӧ тидым ыштышаш?!
Вес амал – изинек англичан йылмым тунемам. Тудым сайын палем, марий йылме деч шагал огыл йӧратем. Англичан йылме дене ОГЭ да ЕГЭ-мат сдатленам.
Молан лачак Марий кундемыш тунемаш толынам йодышлан тыге вашештем: Марий Элыште икмыняр гана лийынам. Кок гана тыште олимпиадыш толынам. А эше тений Звенигово олаште эртаралтше Марий самырык тукым слётышто участвоватленам. МарГУ-што студент-влаклан сай шинчымашым, стипендийым пуат, ӱдыр-рвезе-влаклан тӱрлӧ шӧрыныштӧ вияҥашышт йӧным ыштат. Оласе урем дене ошкылмо годым марла мутланыме чӱчкыдын колалтеш, тидыже поснак кумылым нӧлта. Каныш кечылаште могай гынат марий мероприятий-влак эртаралтыт. Мый моткоч марий шӱлышан улам, сандене Йошкар-Ола – мыйын гай еҥ-влаклан келшыше вер. Адакшым шуко палымем да йолташем тыште илат, – манеш чевер студентке.
Света шочмо кундем деч тораште улмыжлан кӧра лишыл еҥже-влак деч посна йокроклана. Сандене ӱдыр лишыл жапыште «Эрвел марий» ансамбльыш ушнаш шона.
С.Николкинан альбомжо гыч налме фото.