Марий самбистке тале!

11-13 октябрьыште Узбекистанын рӱдолаштыже ӱдыр ден рвезе, юниор ден юниорко-влакын самбо дене тӱнямбал первенствышт лийын. Тушто 28 эл гыч 370 спортсмен участвоватлен.

Российын сборныйыштыжо Свердловск областьын самбо да дзюдо шотышто олимпийский резерв спортшколжын кум воспитанницыже – Екатерина Цыберт, Оксана Кобелева да Екатерина Семёнова – выступатлен.

Тӱнямбал первенствын икымше кечынже Оксана Кобелева пьедесталын кокымшо тошкалтышыштыже лийын – 52 кг марте ӱдыр-влак коклаште сеҥен, лач Украине гыч София Бординскихым эртен кертын огыл.

Кокымшо кечын шӧртньӧ медаль Екатерина Цыбертлан логалын. Тудо 56 кг марте ӱдыр-влак коклаште таҥасен. Тудо Узбекистанын спортсменкыже Г.Коимовам кучедалмаште жап деч ончыч сеҥен кертын.

А кумшо кечын самбо дене шӧртньӧ медальым Екатерина Семёнова налын. Тудо финальный кучедалмаште Францийын самбисткыже Марго Бюром 5:2 счёт дене сеҥен.

Екатерина (снимкыште кокымшо шога) Ачит посёлкышто шочын-кушкын. Аваже Светлана – Ачит район Марий Карший ялын ӱдыржӧ. Ачаже – руш.

Катя Ачит ДЮСШ-ште 1 гыч 11 класс марте тренироватлалтын. Ачит школышто тунеммыж годым спортышто ятыр сеҥымашыш шуын. Самбо да дзюдо дене Свердловск областьысе первенстве ден чемпионатыште, Урал федеральный округын самбо дене первенствыштыже, Российысе турнирлаште сеҥен. Тений 12 февральыште Пермь олаште эртыше Россий первенствыште 52 кг марте нелытан категорийыште 1-ше верыш лектын. Тыге тудым тӱнямбал первенствыш ойырен налыныт. Тыгак Екатерина РФ спортын мастержын норматившым шуктен.

Тӱнямбалысе пьедесталыште икымше лияш манын, ӱдырлан шуко тыршашыже логалын. Теве 2013 ийыште Отрадный олаште эртыше Россий первенствыште визымше верым налын, 2014 ийыште Пермьыште – 5-ше верым, 2018 ийыште Новосибирскыште – 5-ше верым. А 2019 ий тудлан кугу сеҥымашым конден.

Тренерже Айнур Минниахметов тудын нерген тыгерак каласыш:

– Катюша – пеш тале да сай ончыкылыкан спортсменке. Но мыланна ала-мо эре ситен огыл: але пиал тудын велне лийын огыл, але пытартыш секундлаште иктаж-могай йоҥылышым ыштен. Теве тудын результатше-влак шотышто шоналтен ончыза – элнан первенствыштыже вич гана визымше верым налын!.. Пуйто тиде цифр тудын почеш коштын. Но мый сеҥымаш лиймылан эре ӱшаненам. Россий первенствыште тудо сайын кучедалын. Шке нелытан категорийыштыже кучедалме годым лач мучашыште тӱткышыжӧ ситен огыл. 2018 ийыште Новосибирскыште лийше первенствыште тӱнямбал да Европысо первенствылаш кум путёвкым пуэныт. Тунам Катя вич кучедалмаште чылаштым сеҥен. Но финалыште кумшо лийын, да путёвко деч посна кодын.

А тений Пермьыште эртаралтше первенствыште ныл кучедалмаште ончылно лийын. Финалыш логалаш манын, Нижний Новогород гыч Екатерина Егорова дене кучедалын. Но 2018 ийыште ты спортсменке дене таҥасымаште сеҥалтын ыле. Сандене моткоч тургыжланенна. А ты гана Европысо, тӱнямбалысе первенствылаш путёвкым сеҥен налын.