Специальный военный операций кайыме верлаште элнан ятыр кундемлаж гыч тӱрлӧ национальностян рвезе-шамыч порысыштым шуктат. Руш, татар, чуваш, марий да моло салтак-влак, мемнан тыныс илышна верч, илышыштым чаманыде, тушман ваштареш талын шогат.
Ик мероприятийыште СВО-што кредалше салтак, Пошкырт кундем марий рвезе нерген каласкалымым колыштым.
«Байкал» отрядыште служитлыше, отделенийын командирже контракт почеш СВО-ш ушнен. Икымше кече гычак специальный назначениян отрядын составше дене тӱҥ мероприятийлаште участвоватла. Шкенжым грамотный специалист семын ончыктен, военный пашаште профессионал улмыж дене ойыртемалтеш.
Тидыжым тудо тӱрлӧ боевой задачым шуктымыж годым пеҥгыдемден. Нунын коклаште Красноармейский посёлко воктене идалык тӱҥалтыште шуктымо подвигшым палемдаш лиеш. Военнослужащий группын составше дене пырля задачым шуктен. Эскерыме кумдыкышто лиймыж годым тушманын атакыжым чактарен. Гранатомёт дене тудын танкшым да БМП-ым лӱйкален. Тидын дене тушманлан ончыко каяшыже да сай верыште лакемашыже пуэн огыл. Тале кредалмаш годым марий рвезе ВСУ-н кум салтакшым да «Баба Яга» беспилотникшым пытарен. Кредалмаш годым лӱддымылыкым да патырлыкым ончыктымыжлан младший сержантым кугыжаныш награде-влак дене палемдаш пунчалыныт.
А шкеж дене мутланыме годым тыгайрак историйым каласкалыш:
– Мыланна тӱрлӧ задачым шукташ логалеш. Икана позицийым налаш кок-кум меҥгым чара пасу дене ошкылмо годым ушыш тӱрлӧ шонымаш пурен. Тушман шекланен ынже шукто манын, чот писын да шинчашкышт перныде ошкылаш кӱлын. Тидым ышташ куштылгыжак огыл. Вет ме умыленна, иктаж-мом йоҥылыш ыштена гын, ӱмырешлан ты пасушто кодына. Ме нылытын каенна, кажныже шке семынна Юмылан кумалынна.
Кызыт салтак (лӱмжым огына ончыкто) отпускыш толын. Еш дене лийме тат эн шергакан, манеш. Садлан тудлан канышым пайдалын эртараш да вийым погаш тыланена.
Салтакын альбомжо гыч налме фото.