Йошкар-Оласе Сеҥымашын XXX идалыкше лӱмеш тӱвыра полатыште «Марий памаш» фольклорно-этнографический ансамбльын 50 ияш лӱмгечыжлан пӧлеклалтше концерт лийын.
1974 ийыште Марий АССР-ысе тӱвыра министерствын темлымыж почеш Калык творчестве пӧрт пелен ансамбльым ышташ пунчалме. Тудлан марий калыкын мурымаш да куштымаш мастарлыкшым ончыко вӱдаш, аралаш да уэмден толаш ӱшаныме. Тачысе кече марте ты ансамбль марий тӱвырам, йӱлам аралымаште тырша. Пел курым наре марий калыкын куштымаш да мурымаш мастарлыкшым кӱшкӧ нӧлта, кушкын толшо тукымым ты суапле пашалан кумылаҥда.
«Марий памаш» ансамбль кундемыштына веле огыл, тыгак Российысе моло регион-влак коклаште, тӱнямбалне кумдан чапланен. Тудо фольклор да этнографий сынан куштымаш мероприятийлаште Марий кундемын чапшым эреак сайын ончыкта. Лӱмгече концертлан ансамбльын участникше-влак тӱрлӧ куштымаш-влак дене куандареныт. Тыгак Марий Элысе калык творчестве рӱдерын моло коллективше-шамычат выступатленыт.
«Марий памаш» ансамбльым 2000 ий годсек Мария Лазаревна Соловьева вуйлата. Тушко тудо 1989 ийыште балетмейстерлан пашаш толын.
Кызыт ансамбльыште нылле утла еҥ кушта. Нунын кокла гыч Лариса Шабдарова 42 ий, Валера Чиванов 38 ий коштыт.
Палемдыман, витле ий жапыште ансамбльыште лу еш шочын. Тудо вате-марий-шамычын веле огыл, тыгак икшывышт-влакын мастарлыкыштым нӧлтымаште кугун полшен. Кызыт ансамбльыште вич еш: Александр ден Вера Николаевмыт, Денис ден Наташа Шабалинмыт, Дима ден Наташа Шабалинмыт, Сергей ден Лена Поповмыт, изак-шоляк Женя ден Миша Басовмыт — моштымашышт дене куандарат.