7 февральыште 18 шагатат 30 минутлан И.С.Палантай лӱмеш тӱвыра да сымыктыш колледжын (Пушкин урем, 26 №-ан пӧрт) академический музык факультетын концерт залыштыже Марий Элын калык артистше Владимир Ромашкинын усталык касше лиеш. Черетан концертым «Марий кундем» калык семӱзгар оркестр дене пырля ятыр ий пашам ыштымыжлан пӧлекла. Тыгак марий, руш классик-влакын произведенийыштым мура, тудын туныктымо студентше-влак касым сӧрастараш полшат.
Владимир Фёдорович — Курыкмарий районын шочшыжо, пӱрымашыжым, усталыкшым музык тӱнялан пӧлеклен.
«Ты ансамбль дене 35 ий наре пашам ыштем, тӱрлӧ вере концерт дене коштмо, йӱштымат-шокшымат ужмо. Энтузиаст, уста музыкант, симфонический оркестрын дирижёржо Станислав Михайлович Элембаев «Марий кундем» семӱзгар ансамбльым чумырен да мыйым тушко мураш ӱжын. Ты еҥым порын шарнем. Музыкант йолташна шукертак пеленна уке гынат, таче мартеат тудын ансамбльже ила, марий калыкым куандара. Мыят ансамбль дене кылым йомдарен омыл. И.Палантай лӱмеш тӱвыра да сымыктыш колледжын академический музык факультетыштыже вокал сымыктыш пӧлкаште туныктем, ты пӧлкам 1991 ий годсек вуйлатем. Ятыр выпускник Э.Сапаев лӱмеш опер да балет театрыште пашам ышта, вес олалаште шке кӱкшытшым муын. Садлан усталык касыште южо выпускник да кызытсе студент-влакын мастарлыкыштым ужын кертыда. Концертыште микрофоным ом кучылт. Репертуарыште Владислав Куприяновын, Андрей Эшпайын, Владимир .Шабруковын, Сергей Морозовын, Михаил Глинкан да моло композитор-влакын произведенийыштым колышташ темлем. Тыгак руш да марий калык мурылан ыштыме обработко, ожнысо руш романс, неополитанский муро-влак йоҥгалтыт», — ойла В.Ромашкин.
Владимир Ромашкин — тенор. Тудо симфонический оркестр шоктымо почеш лирике да драме оперлан келыштарыме муро-влакым мура, тыгак музыкын моло напраленийже дене пашам ышта.
Артистын ешыжат музык тӱня дене кылдалтын. Концертыште Андрей эргыже фортепьяно да кларнет дене шокташ тӱҥалеш. Андрей Владимирович Москосо Гнесинмыт лӱмеш Российысе музык академийыште нылымше курсышто тунемеш. Кызыт канышыште, тудат концертлан моткоч кӱлын ямдылалтеш.
«Эргымлан — 22 ий, ондак Палантай лӱмеш тӱвыра да сымыктыш колледжыште, вара Озаҥ оласе Н.Г.Жиганов лӱмеш консерваторийыште тунемын. Службым Москосо рӱдӧ военный оркестрыште эртен, умбакыже тунемаш кумылжо лектынат, ынде Гнесинмыт лӱмеш музакадемийыште шинчымашым нӧлта. Пелашем Люция Аклина ятыр ий Э.Сапаев лӱмеш опер да балет театрын хорыштыжо мурен, ынде вес пашам ышта. Репертуарыштына пырля мурымо икмыняр номер уло. Ешыштына ваш умылен, йӧратен да икте-весылан эҥертен илена», — умбакыже ойла Владимир Федорович.
Ромашкинмыт еш Йошкар-Олаште илат гынат, ял дене кылым йомдарен огыл, пелашыж дене Шернур ден Курыкмарий районлаш кудалыштыт.
Владимир Ромашкинын шочмо Курыкмарий районысо Нижнее Шалоболки ялыште пӧртшӧ уло, сад-пакчаже йомакысе моторлыкым ушештара. Пошкудо-влак суртым эскерат, ял деч посна Ромашкинмытлан йокрок, садлан каныш кечылаште тушко вашкат.
Владимир Фёдоровичын ачаже Фёдор Иванович садовод лийын, а аваже Манифа Сергеевна — педагог. Аваже шке солаштыже ик эн ончыч кӱсле, балалайке дене шоктен моштен, сылнын мурен, тудак эргыжлан усталык корным почын. «Ончыч школысо, вара клубысо самодеятельностьыш ушненам. Кудымшо классыште тунеммем годым школышко вашлиймашке композитор Александр Соснов толын ыле. Тунам тудлан мурен ончыктенам, да семмастар тыге ойлен: «Йӱкет пуйто толкын гай лӱҥалтын кая». Тиде ой мылам шкешотан импульсым пуэн. Йолташем Саша Львов музыкальный училищыш тунемаш каяш темлен. Школым тунем лекме деч вара тушко каенам. Мыйым, кужу тоя гай каҥга рвезым, комиссий ончале да «Тый пеш ондак тунемаш толынат, ийготет дене келшен от тол» маныныт. А мурымекем вигак тунемаш налыныт. Уло ӱмырем ты училище, ынде колледж дене кылдалтын», — манеш В.Ромашкин.
Владимир Федорович, музучилищыште кок ий тунеммек, армийыш каен. Тудо Дальний Востокысо погранвойскаш логалын. Тушто рвезын музыкальный улмыжым пален налмек, военный оркестрыш труба дене шокташ шогалтеныт, кунамже мурен. Кажне мероприятийыште оркестр эре ончылно лийын. Пӧртылмек, музучилищым тунем лектын, Озаҥ оласе консерваторийыш каен.
«Мый моткоч пӱртӱсым йӧратем, тудын шочшыжо улам. Марий чодыра шӱм-чон поянлыкнам пойдара, йырваш ончал колтет, могай гына сӱретым от уж: теве ур тӧршталта, мераҥ кудал эрта, кӱдыр муралта. Тӱрлӧ кайыкын шке мурыжо, колыштат, шулдыран гай чучат», — ойла мурызо.
Владимир Ромашкинын усталык касшым ончаш пагален ӱжына.