Марий Эл гыч мозайке дене сӧрастарыме пӧрт Российысе эн ӧрыктарыше арт-объект онлайн-энциклопедийыш да интерактивный картыш пурен.
Шкешотан энциклопедийышке 85 регион гыч участник-влак логалыныт. Нуно Россий мучко эртаралтше Туту Арт конкурсышто таҥасеныт. Сеҥышыш Магадан гыч кӱртньӧ гыч ыштыме мамонт лектын.
Мероприятийышке Марий Эл гыч Галина Иванова ушнен. Тӱдо пу пӧртшым тӱрлӧ тӱсан пластик атын петыртышыже-влак дене сӧрастарен. Сулен налме канышыш илен шушо ӱдырамаш пий сӱрет гыч сӧрастараш тӱҥалын, а вара пӧртын тӱжвал пырдыжыштыже кӧгӧрчен, йӱксӧ, имне, лыве, агытан, пеледыш ден тӱрлӧ орнамент погалтыныт.