Российысе дизайнер-влакын «Исток-2024» конкурс-ончерышт Йошкар-Олаште Изосымыктыш тоштерыште 26 январь марте ончыкталтеш.
Ончерыште сылне календарьым ончыктымо. Тудын авторжо – Йошкар-Оласе художественный училищын тенийысе выпускникше Илья Макаров. «Дизайнер» специальность дене тунемше студент шке диплом пашажлан «Марий календарь» темым ойырен налын. Тудо экзаменысе комиссийлан путырак келшен, сандене «визытан» отметке дене палемдалтын. Мыламат ты паша чонемлан лишыл лие. Ала марий улмемлан кӧра, ала чынже денак кумылым савырыше.
Илья Йошкар-Олаште шочын-кушкын. Тукымыштыжо марий улмо-укем рашемдыде, тыгай пашалан шокшым кергалтенак пижын. Диплом пашам вуйлатышыже Т.П.Хапован мутшо почеш, Илья Макаров ты паша дене кок ий «толашен», тӱрлӧ стилистикан ятыр вариантым ыштылын.
Рвезе марий калыкын шке йӱла календарьже ожнысек лиймым пален налын, но чыла марий еҥ тидын нерген огеш пале манын ӧрын. Сандене тидын шотышто шке надырым пыштен кертме шонымаш ушышкыжо пурен. Тыге выпускник полиграфический савыктышым книга семын ямдылен. Тушто календарьын историйже, идалыкын янлыкше-влак (тотем) да марий тӱвыраште нунын рольышт нерген каласкалыме.
И.Макаров деч «Мом ышташ эн неле ыле?» манын йодмеке, оҥай вашмутым кольым:
– Мыланем янлык фигурко-влакын конструкцийыштым ышташ йӧсыла чучын. Нуным пробный макетыш пӱчкедашат чот шуко жап кӱлын, вет моткоч изи кугытан улыт.
Иллюстрацийым гын келыштараш нимо нелыжат уке. А фигурко-влакым оформитлымаште чыла нюансым шотыш налман, погымо годым узор-влак икте-весыштлан келыштаралтшаш улыт, тыгак ямде паша ты але вес янлыкла койшаш.
Марий календарьысе сӱретан конструкций-влакым пӱчкеден луктын погашат лиеш. Тидыже йоча да турист-влакланат келшен толеш, шонем. Вет тушто сылне марий тӱр-влакым кучылтмо.
Диплом вуйлатыше Т.Хапован мутшо почеш, календарьлан ямдылыме концептым кызытеш тӱрыснек шуктымо огыл. Йодмаш лиеш гын, ты пашам мучашлаш да календарьым ужалымашке лукташ йӧн почылтеш. Вет тудо чынжымак мотор дизайнан!
Эльвира Терентьева.
Фото-влакым И.Макаровын альбомжо гыч налме.