30 августышто Кораксола тӱвыра пӧрт пеленысе «Муро кумыл» фольклор ансамбль да Ярансола ялын чолга гармоньчыжо Вениамин Борисов уэш верысе калыкым Кораксола ялын каныме паркышкыже чумырышт. Калык кугу кумыл дене толын.
Кузе от тол?! Вет шукерте огыл Кораксола ялнан лӱмлӧ эргыже, Морко ола шотан илемым вуйлатыше В.А.Борисов ты каныме паркнам тӱрыс уэмдыктен. Йырваш у да мотор савар уло яллан волгалтеш. Валерий Александровичын тыршымыж денак Кораксола ял покшелнысе чапле памашна йырат у савар чоҥалтын. Лач тиде айдемын вуйлатымыж почешак верысе самырык тукым ты пашалан пижын да чылажымат уэмден. Тау Кораксола ялнан тыгай чолга эргыжлан.
Марий касышке калык ятырак погыныш. Тидланже ме тыге шонен пыштенна: кажне тылзын 30-шо кечынже Кораксола тӱвыра пӧртыштӧ Марий касым эртараш, программымат кажне гана эре уэмдаш. Теве «Муро кумыл» ансамбльнан репертуаржат эреак вашталтын толеш. Ик гана йоҥгалтше муро вес касыште ок йоҥгалт. А вет марий калыкнажын муро поянлыкше, ой-ой, могай кумда. Тӱрлӧ оҥай модыш, таҥасымаш пайремнам сӧрастара. Лач тыге ме шке кугезына-влакын илыш да пайрем йӱлаштым арален толына. Эсогыл кочкышнажат кажне гана вес тӱрлӧ. Тидыжлан мый Марий касышкына пагален толшо поро калыкланат таум вел ойлем.
Ты гана пайремыш еҥ-влакат марий тувырым чиен толыныт, пеленышт кочкышым конденыт. Тидыжак Кораксола кундемысе калыкын ик ой дене келшен илымыж нерген ойла. Тора верыште илыше унана-влакат икмынярын ыльыч, тидыже адакат чоныш куан кумылым ешара. Марий кас нуным уэш шочмо велыш толаш кумылаҥден.
Ынде ме черетан Марий каснам 30 сентябрьыште эртараш шонена. Тушко лач Кораксола ялысе калыкым веле огыл, пошкудо яллаште илыше-влакымат уло кумылын пагален ӱжына. Тек чумыр кундем пален налеш мемнан ваш келшен, веселан илен моштымынам, шочмо калыкын йылмыжым, тӱвыражым арален шогымынам, Марий Эл Республикым Вуйлатышын сомылжым жаплан шуктышо Ю.В.Зайцевын илышыш шыҥдарыме «Марий кеҥеж» уремысе фестивальжым кӱкшын аклымынам да умбакыжат вияҥден толмынам.
Мый шке шочмо-кундемысе калыкем дене моткоч чот кугешнем! Ончыкшымат тыге рӱж, ваш келшен, веселан жапым эртараш тӱҥалына гын, Кораксола тӱвыра пӧртнат гармонь сем да муро йӱк дене шергылташ тӱҥалеш.
Елена Григорьева, Кораксола тӱвыра пӧрт вуйлатыше.