– ойла А.Мерганов.
Алексей Кострома олаште шочын. Ачаже – военный, сандене тудым Марий Элышке колтеныт. Еш Йошкар-Олаш илаш куснен. Рвезе тунам кум ияш лийын. Кудымшо классыште тунеммыж годым еш шочмо олашкыже пӧртылын. 14 ияшыж годым Алексей кӧ лияш шонымыжым умылен да умбакыже тыршен тунемын. Школым тунем пытарымеке, Алексей Москосо МХАТ студий-школышто продюсер факультетыште «Театровед-менеджер, продюсер» специальностьым налын. Тунемме жап куштылгыжак лийын огыл. Шкем сценыште кучаш тунемман, тӱрлӧ рольлан келшышын койын моштыман улмаш.
МХАТ-ым тунем пытарымеке, Алексей шке вийжым театрыште, телевиденийыште терген. Тоштерыште, йӱкым возымо студийыште туныктен. Тыгак рок-группо денат концерт дене коштын.
Кызыт «Царицыно» кугыжаныш музей-заповедникыште йӱк режиссёрлан пашам ышта.
– Паша верем сӧрал: мотор зал, выставке-влак улыт. Тыгак оҥай концерт-влак эртаралтыт. Тӱҥ шотышто джаз да классике муро-влак йоҥгат,– ойла Алексей.
Тыгак А.Мергановын шке студийже уло. Тушто тудо мураш туныкта, аранжировкым ышта, семым воза.
–Усталык паша дене кылдалтше еҥын кечыже кузе эрта?
– Таза лияш да тӱрлӧ неле йодыш-влакым рашемден керташ манын, кажне кечын куржталам, зарядкым ыштем, а вара йӱштӧ вӱд дене душышто чывылалтам. Паша вер марте кок шагат кудалман, сандене, шонымашышкем шуаш манын, корнышто тӱрлӧ йылме дене тестым эртем, книгам лудам але йылмым палыше-влак дене соцсетьлаште возкалем. Тыгак марий йылмымат тунемам. Кок верыште пашам ыштем, сандене кас велеш ик паша гыч весыш кудалам.
– Марий йылмым тунемаш мо але кӧ таратен?
– Марий йылмым икмыняр гана тунемаш тӱҥалынам ыле, но тӱрлӧ амаллан кӧра кокымшо планыш шӱкалаш логалын. Кызыт тидлан посна жапым ойырем. Марий йылме дене книга-влакымат, видео-урок-влакымат Интернетыште кычалам. Ондак этнограф да лингвист Платон Лукашевын пашажым шымленам, сандене тӱрлӧ калык-влакын культурыштышт икгайлыкым кычалаш оҥай.
– Творческий корным ойырен налметлан ачат тореш лийын огыл?
– Изиэм годсек мый поэзийым да мурым йӧратенам. Эре ала-могай у семым шочыкташ шоненам. Шарнем, тӱҥалтыш класслаште тунеммем годым музыкальный школышто сольфеджио дене урок лийын огыл. Мый фортепиано ваштареш шинчынам да ондак ыштыдыме мӧҥгысӧ пашам шергалынам. Ик нотан строкам ужын шокташ тӱҥалынам. Тунам «юзо» шӱлышым налынам.
– Марий Элысе гыч иктаж йолташет дене кылым кучет?
– Кажне йолташемым мый тачат шарнем. Йошкар-Олаш унала толын каяш шонем. Кудывечынам, тораште огыл улшо изирак чодырам, курыкым, школым, музыкальный школым, кекусинкай каратэ школым ончалнем, Какшан вӱдеш йӱштылнем. Тылеч посна марий калыкын илыш-йӱлажым шукырак пален налнем. У йолташ-влакымат муам манын ӱшанем. Толмемлан марий йылмым тунем шуам манын шонем. Йошкар-Оласе опер да балет театрыште орган концерт лиеда манын колынам ыле. Ынде Марий Элыш толын каяш амал ятыр погынен.
Алексей деч примерым налын, мыланнат шочмо йылмынам сайынрак тунемаш да марий калыкын илыш-йӱлажым келгынрак шымлаш кӱлеш. А рвезым ме Марий кундемыш унала вучена!