Марий йылмым кушто да кузе туныктат?

Нине йодыш-влаклан вашмутым ме икмыняр туныктышо деч пален налына.

Марина Петровна Сташкина Свердловск кундем Ачит район Марий Карший ял школышто марий йылмым да литературым туныкта.

 Марий йылмылан да литературылан ик шагат дене ойыралтеш. Нине предмет-влакым шочмо йылме семын туныктена. Шукыж годым урок деч вара кодаш логалеш. Олимпиаде але мероприятий деч ончыч чот ямдылалтына.

Тораште илымылан кöра чыла марий книга мемнан деке миен огеш шу. Мый лучко ий олимпиадыш коштам. Свердловск кундемыште марий да татар йылмыла дене областной олимпиадым эртарат. Областьыште сеҥыше-влакым Марий Элыш колтат, сандене тунемше-влак марий йылмым уло кумылын тунемыт. Олимпиадыш коштыт. 7-8-ше класслаште тунемше-влак  кушкын шумыштым вучат, нунат, олимпиадыште сеҥен, Марий Элыште эртарыме регинысо этапыш толаш шонат.

Школ воктенак клуб уло. Тушто «Пеледыш» йоча фольклор ансамбль пашам ышта. Нунын дене пырля тÿрлö мероприятийым эртарена. Но ме кеч-кузе тыршена гынат, чылажат еш гыч тÿҥалеш. Икшыве-влак ешыште кушкыт, сандене ача-аван полышышт деч посна огеш лий. Нуно ешыште марла кутырат гын веле марий йылмым туныкташ куштылгырак.

Лилия Владимировна Волкова, Шернур посёлкымо 1-ше №-ан школышто марий йылмым туныкта.

Чаманен каласыман, кызыт ме марий йылмым кугыжаныш йылме семын веле туныктена. Туге гынат марий йоча-влакым шке шочмо йылмыштым аклаш, пагалаш, а южыштым марий йылме дене мутланаш туныктена. Тидоан тÿрлö йöным кучылтына. Марий йÿла дене кылдалтше пайремым эртарена, тÿрлö конкурслаште, олимпиадылаште, семинарлаште вийнам тергена. Пайрм але мероприятийым эртараш тÿҥалме деч ончыч тунемше-влак шке кумылын полшаш толыт. Тидыже мыланем эн шерге.

Марий йылме кабинетыште компьютер ден проекторна уке. Сандене тÿҥалтыш классласе туныктышо-влак дене кутырен келшен, уроклан кабинет дене алмашталтына. Нунын чыла оборудованийышт уло, тидлан ача-ава-влак шийвундым погеныт, а мемнан тыгай йöнна уке. Туге гынат ме вуйым огына саке, мероприятий-влакым эртарена, олимпиадылашке коштына, сылнымутланат жапым ойырена.

Тугеже марий йылмым туныкташ манын, шуко вийым пыштыман. Мутлан, тора кундем гыч книга-влакым налаш Марий Элыш кошташ логалеш. Тÿрлö йöным кучылтын, марий йылмым аклаш, пагалаш да тунемаш таратыман.