Марий Йӱштӧ Кугызан илемжым ужаш – пиал

Шукерте огыл Шернур мланде Марий Элнан 10 районжо гыч уна-влакым шокшын вашлие. Шернур посёлкышто «Йӱштӧ Кугыза деке унала» фестиваль-таҥасымаш эртаралте.

Ты пайремыште Морко кундемын чапшым Кораксола тӱвыра пӧрт аралыш. Таҥасымаш кок ужаш: шке дене палдарымаш да модыш алан гоч шке усталыкым почын ончыктымаш гыч шоген. Морко кундемнан «Юзо вий» командыже поснак чолга лийын. Мероприятий «Йӱштӧ Кугыза деке унала» манын марла йоҥгышо лийын гынат, чаманен каласыман, 10 команде гыч лач кокытшо веле шке усталыкшым яндар марий йылме дене почын пуэн. Моло участник-влак рушла выступатленыт. Ты пайрем тӱрыснек марла эртаралтеш гын, тидыже шочмо йылмынан вияҥын толмашкыже ешартыш надыр лиеш ыле. Тыгак таҥасымашын иктешлымашыжат чоным коржо: Йошкар-Олан руш Йӱштӧ Кугызаже ончылно лие да «Йӱштӧ Кугыза – 2022» титул дене палемдалте.

Арамлан огыл калык ойла: «Тоя кок мучашан». Чынак, ик велже кумылым волта гын, а вес велже, мӧҥгешла, нӧлталеш. «Йӱштӧ Кугыза деке унала» фестиваль-таҥасымаш мыняр-гынат кумылым волтен колтыш, но кунам чыла уна-влак, 100 наре еҥ, Кукнурышто верланыше Марий Йӱштӧ Кугызан илемышкыже тарваныш, йӧршын вес сӱрет. Тышке логалаш чылалан пиал огеш шыргыжал. Кӧ ты кечын Марий Йӱштӧ Кугызан илемжым ужын, шкенжым эн пиаланлан шотлен дыр. Йырваш марий шӱлыш чоным вӱчка. Йӱштӧ Кочан илем кумдыкшо мучко экскурсий 2 шагатат пеле жап шуйна. Коҥгаште шӱрашан мелна чеверген кӱэш, туштак команмелна дене калыкым сийлат… Тидыже чынже денак кумылым вӱчка.

Ме Шернур мландын унаже лиймылан моткоч йывыртенна. Тиде юзо шӱлышан кундемыш миен толаш чумыр Кораксола тӱвыра пӧрт лӱм дене мый Морко районысо клуб системын вуйлатышыже В.А.Дмитриевлан да тудын алмаштышыже Л.Ф.Кирилловалан, методист Л.В.Токташевалан пеш кугу таум каласем. Тек ончыкшымат марий шӱлыш озаланен толеш. А самырык тукым, марий тувырым чиен шогалмекыже, ик руш шомакымат огеш пелеште, а марла вел кутыралтен колта. Лач тыге гына ме шке марий улмына дене кугешнен кертына. Вияҥдыза шочмо йылмыдам, тудын ончыкылыкшо волгыдо лийже манын, шке надырдам пышташ ида вожыл!

Елена Григорьева, Кораксола тӱвыра пӧрт вуйлатыше.

Снимкыште: «Йӱштӧ Кугыза деке унала» республик кӱкшытан фестивальыште Морко кундемын чапшым аралыше Кораксола тӱвыра пӧрт.