11-13 ноябрьыште Йошкар-Олаште «Танцуй и пой, моя Россия!» российысе фестивальын регионысо отборочный этапше эртен.
Тушто Марий Эл, Чуваший, Чечня республикла, Самара, Архангельск кундемла да Моско гыч коллектив-влак мастарлыкыштым ончыктеныт.
Фестивальын организаторжо, президентше Айдар Шайдуллинын мутшо почеш, тыгай фестиваль тений визымше гана эртаралтеш. Мо сайже: тушко профессионал гына огыл, тыгак самодеятельный коллектив-влак ушнен кертыныт. Заочный этапыште участник-влак фото-, аудио-, видеоматериал-влакым аклаш колтеныт. Эксперт-влак эн сай участник-влакым очный этапышке ӱжыныт.
Регионысо отборочный этапым тений гына эртараш тӱҥалме. Эн ончыч Архангельск кундемыште лийын гын, вара – Марий Элыште.
Марий Эл гыч заочный этапыш 29 коллектив йодмашым пуэн, тушеч 14-ше отборочный этапышке лектын. «Этнический коллектив-влак» номинацийыште «Весела кумыл», «Марий памаш», Т.Дмитриева лӱмеш мурышо да куштышо «Эрвел марий», «Мурсескем» фольклор ансамбль-влакым, Всемарийский кӱслезе-влакын коллективым палемдыме. «Хореографий искусство» номинацийыште «Улыбка», «Ассорти» эстраде куштымаш, «Марий Эл» лектыныт. «Вокал» номинацийыште «Эреҥер» калык муро ансамбль ойыртемалтын.
Фестиваль годым тыгак уш-акылым пойдарыме, мастарлыкым таптыме мастер-класс, лекций-семинар, «йыргешке ӱстел» лийыныт.
Гала-концерт Э.Сапаев лӱмеш опер да балет академический театрыште эртен, 18 коллектив выступатлен. Нунын коклаште – Чечня кугыжаныш куштышо «Вайнах» ансамбль, Самара кундемысе П.Милославов лӱмеш Волжский руш калык хор, Москосо «Гжель» кугыжаныш академический куштышо театр, «Марий Эл» кугыжаныш куштышо ансамбль да молат. Тушко Марий Элым Вуйлатыше Юрий Зайцев толын, ты фестивальын кӱлешлыкшым палемден.
Сеҥыше-влак 7 декабрьыште Москосо Кугыжаныш Кремль полатыште гала-концертыште мастарлыкыштым ончыктат.
Фестиваль Российыште илыше тӱрлӧ калык куштымашым иктеш уша, нунын тӱвырашт, муро-куштымашышт нерген палдара, коллектив-влаклан вияҥаш, мастарлыкым нӧлташ, икте-весе деч опытым погаш йӧным пуа. Тудо моткоч кӱлешан да пайдале.
