Марий Элыште Креативный индустрий школ почылтеш

Денис Речкинын фотожо.

Тудо у тунемме ий гыч Палантай лӱмеш тӱвыра да сымыктыш колледжыште пашам ышташ тӱҥалеш. Тидын нерген Республикым вуйлатыше Александр Евстифеевлан Тӱвыра министр Константин Иванов совещанийыште увертарен.

Россий Федерацийын Тӱвыра министерствыже креативный школым почашлан конкурсым увертарен ыле. Марий Эл сеҥышыш лекше 33 Россий субъект коклашке (85 субъект кокла гыч) логалын. Школым шуарашлан федерал бьюджет гыч 44 миллион теҥгем ойыреныт.

«Кодшо ий гыч Талантан йоча-влаклан гимназий колледжыш пурен. Тушто кумшо пачашыште Креативный индустрий школым почына. Чылажге школ 1000 квадрат метр кумдыкым налеш. Куд студий пашам ышташ ямдылалтеш: йӱк режессур, анимаций да 3D-графике, кызытсе электрон музыка, фото да видеом ыштымаш, дизайн, интерактивный цифровой технологий. Чапле да ойыртемалтше аппаратурым налын шындена. У верыш тунемаш толшо йоча-влаклан ме чыла йӧным ыштышаш улына» , — увертарен Константин Иванов.