4-5 майыште «Артек» тӱнямбал йоча рӱдерыште «Сеҥымашын историйже» визымше смене тӱҥалын. Тушко «Живая классика» Российысе конкурсын региональный этапыштыже сеҥыше-влак каеныт.
Нунын коклаште Марий Эл гыч ӱдыр-рвезе-шамыч улыт: Т.В.Иштрикова лӱмеш «Синяя птица» гимназийыште 7-ше классыште тунемше Юлия Скулкина, Марий Турек школышто 6-шо классыште тунемше Сергей Петров да Йошкар-Оласе 11-ше №-ан лицейыште 7-ше классыште тунемше Ариана Хорикова. Артекыште «Живая классика» конкурсын полуфиналже да финалже лийыт.
Тиде арнян Марий Эл гыч спецоперацийыште участвоватлыше салтак-влакын икшывыштат «Артекыште» канат.
Нуно спорт мероприятийлаште вийыштым тергат, усталык мастерскойышто да экскурсийлаште лийыт.
Каласыман, Марий Элыштат СВО-што улшо военнослужащий-влакын икшывыштлан канаш йӧн идалык мучко ышталтеш. 2022 ий годсек республикысе лагерьлаште тӱжем утла йоча лийын.
Фотом Образований да науко министерствын ВК-се лаштыкше гыч налме