Марий ӱдыр моторак! 

Ты моторлык конкурсышто тений Марий кундемын ӱдыржӧ — Мария Корчемкина – участвоватла. Таҥасымаш идалык мучко эрта. Марий Турек район Нартас кундемысе Лесной посёлкышто шочшо Мария верч март мучко йӱклышна. Куанышна: марий ӱдыр шукырак йӱкым погыш да сеҥышыш лекте.

М.Корчемкина Москосо Сокольники районышто верланыше ик частьыште отделений начальниклан пашам ышта. Тыште служитлымыжлан тений кеҥежым кок ий темеш.

Мария военный лийме нерген изиж годым шоналтенат огыл. Чолга лийын, тӱрлӧ вере таҥасен, ече дене коштын, моло соревнованийышкат каяш вуйым шупшын огыл, спорт туризм ден ориентированийыште шке вийжым республикыштат ончыктен. Физкультур дене тунам йоча-влакым опытан педагог Владимир Николаевич Волков туныктен, турист спортлан шӱмаҥден шоген.

Ӱдыр Марий Пыламарий школышто 8-ше классым пытарен, Советский район Ургаш лицей-интернатыш тунемаш каен. Кадет классыштат сайын тунемын, «5» отметкыжат моло деч шукырак лийын.

Но куш тунемаш кайышашым Мария пален огыл. Корныжо Санкт-Петербургыш виктаралтын. С.М.Будёный лӱмеш военный связь академийыш 18 ияш тунемаш пурен. Вич ий тунеммеке, ӱдырым Москошко колтат. Кызыт туштак служитла.

«Каныш жапыште мом ыштет?» — йодым М.Корчемкина деч. «Яра жапем укеат. Мый часть деч тораште огыл верланыше тӱшкагудышто илем. Чӱчкыдынак командировкышко коштына. Канаш шагал жап кодеш. Ача-авам деке Марий Турек районыш идалыклан кок гана миен коштам. Авам Раисия Ивановналан да ачам Николай Васильевичлан ончен куштымыштлан, туныктен лукмыштлан моткоч кугу таум каласем», — каласыш Мария.

Корчемкинмыт ешыште кок ӱдыр кушкын. Кугуракше, Екатерина, менеджер профессийлан тунем лектын, марлан каен, кызыт икшывым онча. Изиракше Мария пеҥгыде койышан да неле илышым ойырен налын. «Чынжымак, военный паша ӱдырынат огыл, маныт. Туге гынат чыла гаяк частьыште ӱдырамаш-влак служитлат. Тыгай корныш тарваныше самырык еҥ-шамычлан чакныман огыл, тек шке шонымашышкышт шуыт. Мыят илышысе эн кугу наградемлан тунем лектын служитлаш тӱҥалмемым шотлем», — ойла гвардийын лейтенантше.

Кызыт «Красная звезда» газетын миссше» моторлык конкурсышто кажне тылзын  сеҥышым ойырен налыт. Вара нуно вес идалык тӱҥалтыште икте-весышт дене таҥасаш тӱҥалыт. Тыматле койышан марий ӱдырлан  конкурсышко ушнаш редакцийын фотографше Кристина Уколова темлен. Тудо ӱдыр дене 23 февраль пайрем вашеш репортажым ыштыме деч вара палыме лийын.

Эльвира Терентьева.