Спортсмен-влак дене кугешнем! Сеҥымашке шуаш манын, эр-кас заниматлат, пӱжвӱдым йоктарат. А тиддеч посна могай сеҥымаш? Тидым Звенигово район Эсмекпляк селаште шочын-кушшо, куштылго атлетике дене ятыр ий кылым кучышо спортсмен Олег Манасов сайын умыла. Ик гана веле огыл Марий Эл Республикысе, Юл кундем федеральный округысо таҥасымашлаште ончыл верлаш лектын.
Спортыш – сцене гоч
Эсмпекпляк школышто тунеммыж годсек рвезе чолгалыкше дене ойыртемалтын. Ик верыште шинчен огыл – эре кушто гынат шкем терген. Тудо рвезе-влак дене мечым чумедылаш, футболла модаш гына мо йӧратен? Уке. Марий тӱрымат тӱрлен ончен, школ спектакльыштат рольым модын.
«Усталык шӱлышан еҥ улам. Тӱҥалтыш класслаште тунемме годымак икымше туныктышна марий йылмылан, тӱвыралан шӱмаҥден. Ме тӱрлӧ заметкым, статьям возенна, тыгак марий тӱрым тӱрлаш тунемынна. А кугурак класслашке вончымеке, театральный кружокышко кошташ тӱҥалынам – шомакшым тӱҥале рвезе – Но утларакшым руш спектакль-влакым шындыме. Мый тӱрлӧ образым чоҥаш йӧратенам: шоҥго кочам, Пире рольым модмем кызытат шарнем. Постановко, спектакль-влакым школышто веле огыл, тыгак районыштат ончыктенна.
Чылаштым ончылтен сеҥен…
Усталык паша – тиде икте, садак спорт модмаш, куржталыштмаш кажне гаяк эрге икшывылан лишыл кодыт. Тиддеч посна могай йоча пагыт? Олег спортым ӧрдыжеш коден огыл: футболла модын, тӱрлӧ таҥасымашке ушнен, физкультур дене олимпиадышке чӱчкыдын коштын. Туге гынат тунам спорт дене илышым кылдаш шонен огыл. А икана кугу сеҥымаш тудын шонымашыжым тӱрыс вашталтен.
«Чылажат 7-ше класс гыч тӱҥалын. Тунам школыштына Совет Ушем Герой Родион Охотин лӱмеш таҥасымаш лийын. Мые 9-ше, 10-шо, 11-ше класслаште тунемше-влакым ончылтенам да икымше верышке лектынам. Тиддеч вара куштылго атлетикым йӧратен шынденам», – каласыш Олег Манасов.
Эсмекпляк школышто физкультурым Олегын кокаже Валентина Арсентьевна Николаева туныкта. Очыни, писын куржталыштме мастарлык, спортым йӧратыме койыш туддеч кусненыт. Шке тукым шольыжым эскерен, тудым районысо чыла таҥасымашке коштыкташ тыршен. 9-ше классыште Физкультурникын кечыже лӱмеш Звенигово олаште эртыше таҥасымаште Олеш сеҥен. Тунам рвезын ончыкылыкшо рашемын. Школысо физрукын темлымыж почеш, тудо 2010 ийыште Йошкар-ола воктенысе Семёновка селасе Олимпийский резерв училищышке каен.
Ик тренировко почеш весе….
А тыште спортлан профессионально туныктат. Расписаний почеш тренировко, таҥасымаш-влак, бассейн. Уста тренер-влакын надырышт ончыкылык спортсмен-влаклан кушкаш, сеҥымашыш шуаш негызым ыштеныт. Куштылго атлетике дене Олег республикысе, варажым Юл кундем федеральный округысо первенствыште, чемпионатыште ончыл верлашке лекташ тӱҥалын.
«Ик ият пеле мый ече таҥасымаш дене заниматленам. Но спортын ты видше пешыже ыш келше. Сандене тренер Константин Петрович Лукьянов мылам куштылго атлетикыш куснаш темлыш. Тыге кокымшо курс деч вара кӱкшӧ результатыш шуаш тӱҥальым. Тидлан мылам тренировко чот полша. Кажне кечын эре куржталме, шкем нагрузкылан ямдылыме. Тунам кугу дистанцийым куржат гынат, нойымым от шиж. Кумшо курсышто Йошкар-Олаште эртыше Нацийын кроссыштыжо икымше вер дене палемдалтым, куштылго атлетике дене республикысе чемпионатыште сеҥышыш лектым. Но эн кугу сеҥымашлан мый Юл кундем федеральный округысо первенствым шотлем. Тушто мый кокымшо верым налынам. Вич уштышым 15 минутат 3 минутышто куржын толынам», – ойла О.Манасов.
Дипломым налмеке, О.Манасов армийышке каен. Пӧртылмеке, МарГУ-шко спортфакыш тунемаш пурен. Вузын чапшым ик гана огыл арален.
Куяр посёлкышто эртыше курык коклаште куржталме шотышто Российысе чемпионатыште тудо 7-ше лийын. Тыгай кӱкшытыш шумыжлан «Спорт мастерыш кандидат» лӱмым пуэныт.
Контракт почеш кодын
О.Манасов вузым тунем пытарен огыл. Кумшо курс деч вара военный корнышко шогалын. Ынде кумшо ий Йошкар-Оласе ракетный дивизийыште служитла. Куштылго атлетике дене тыштат заниматла, тиддене Пенза, Пермь, Волгоград, Озаҥ, Чебоксар олалаште эртыше соревнованийлаште участвоватла. Тыгодым сеҥымашыжат ятыр.
А шукерте огыл, 5 июньышто, О.Манасов Йошкар-Олаште «Зеленый марафон» Россий куржталмаште таҥасен да икымыше верыш лектын. Самырык рвезе ончыкыжым вузым тунем пытараш да куржталышташ йӧратыше тӱрлӧ профессиян еҥ-влакым иктеш погаш да нунылан посна клубым чумыраш шона.
Военный илыш-корнышко шогалше рвезылан спорт – йӧратыме сомыл. Куржталде, тудо ик кечымат огеш чыте. Тыгодым усталык койышыжат йомын огыл. Почеламутым рушла возкала, тӱрлӧ куштымашым тунемеш, шуко книгам лудеш. Тыгерак самырык рвезе илыш дене тӧр ошкылеш.