5 октябрьыште Параньга район Матародо села воктенысе каныме базыште Макар Ведат тукымын вашлиймашыже эртаралтын.
Тушко 120 наре еҥ погынен. Шукынжо вашла икымше гана ужыныт, палыме лийыныт. Макар Ведатын тукымвожшо Матародо селаште тӱҥалеш. Но Ведатын шочмо ийжым кызыт огыт пале…
«Тиде вашлиймашыш Макар Ведатын Васлий, Ониса, Наталя, Ана, Марля шочшыштын родо-тукымышт толыныт. Утларакшым Василий эргыжын тукымвожшо гыч еҥ-влак лийыныт. Садлан Васильевмыт родо-тукым вашлийынна, манаш лиеш. Мутлан, мый Макар Ведат Василий Микалай Зинан ӱдыржӧ улам. Мыйын шочшемат, уныкамат тышке миеныт», – ойла Кужэҥер район Йӱледӱр тӱвыра пӧртым вуйлатыше Людмила Романова.
Тылеч посна вашлиймашыште телевӱдышӧ Людмила Фёдорова, Маврий Элын сулло врачше Светлана Николаевна Сидорова, Марий Элын сулло агрономжо Галина Владимировна Силина, ялозанлыкын сулло пашаеҥже Александр Владимирович Васильев да моло профессиян уста еҥ-шамыч лийыныт да жапым пырля оҥайын эртареныт.
Васильевмыт тукым гыч Альберт Николаевич Васильев ден Лидия Николаевна Гребнева Матародо селаште ты тукымым аралат. Чыла родо-тукым шочмо верышкыже толеш гын, нунын деке унала пура. Тиде мероприятийым Микалайын Вероника уныкаже, Лидия Николаевнан ӱдыржӧ – Вероника Исакова – организоватлен. Тудо шкеже Шорсолаште ила да йочасадыште поварлан пашам ышта. Микалайын родо-тукымжо икте-весе дене ватсапыште мутлана. Йоча-влакын фотоштым вераҥдымеке, икте-весе дене палыме лияш да вашлияш кутырен келшеныт.
Эльвира Терентьева.
Фотом Л.Романова колтен.