Волжский районысо Мӱшылъерыште теҥгече адакат вӱд волен каен. «Ончычсо семын 5-6 метрлан огыл, а иктаж 15 метрлан!», — маныт ты кундемыште илыше-влак.
— Чынжымак тиде кечылаште вӱд пеш чот шагалемын. Шкат паледа, сер пеш тура тушто, воронка гай аҥысыремын вола, сандене пеш келгыш ужаш ок лий, — рашемдаш полшыш Сотнур администраций вуйлатыше В.Солдатов.
Ты кундемым ПГТУ-н доцентше А.Ивановын вуйлатыме «Розовый одуванчик» экологий ушем икмыняр ий шымла.
— Пытартыш гана ӱмаште октябрьыште вӱд 10,5 метрлан волен ыле. Амалжым раш каласаш неле. Уло республик мучко тавылаште вӱд шагалеммым ойлат. Кызыт ерыште мынярлан волен огына пале, ий кечен кодын, а вӱд эшеат йымалнырак лийын кертеш. Тений 12-13 февральлан (ӱмаштак тыге палемдыме улмаш) студент-влак дене тушко экспедиций дене каяш шонена, тунам чылажымат утларак рашемдаш лиеш, — каласыш Алексей Андреевич.
Эдуард Иманаев.
Мӱшылъерыште вӱд 2010 ийыште йомаш тӱҥалын,
2014 ий телым 8,5 метрлан, а вара утларак да утларак волен.