Медведево район Руэм посёлкысо ипподромышто эртаралтше «Йошка Еш» регион-влак кокласе гастрономический фестиваль Мӱндыр Эрвел гыч Арктика марте регион-шамычым чумырен.
Ты мероприятий элнан гастрономический илышыжым ончыктышо ик эн кугу событий семын ончыкталтын. Тыгак «Туризм и индустрия гостеприимства» нацпроектым илышыш пуртымашын эн тӱвыргӧ пашаж семын палемдалтын.
Фестивальыш 12 регионын делегацийже ушнен. Нуно элыштына илыше тӱрлӧ национальностян калыкын кочкышыж дене палдареныт. Кок кече жапыште 35087 порций национальный кочкыш ден йӱышым ямдылыме. Тушто 50 утла шеф-повар, ресторатор да «Гастрономическая карта России» федеральный проектын еҥышт участвоватленыт. Мероприятийым организоватлымаште да эртарымаште 50 утла волонтёр тыршен. Нуно участник да уна-шамычлан чыла шотыштат йӧнан лийже манын, кугу пашам шуктеныт.
«Гастрономическая карта России» проектын арт-вуйлатышыже Екатерина Шаповалован вуйлатымыж почеш, ресторатор-влак фестивальлан менюм лӱмын келыштареныт. Тыге уна-шамыч элыштына ыштыме продукт гыч ямдылыме 250 тӱрлӧ кочкышым да йӱышым тамлен кертыныт. Ковышта гыч ыштыме перпечым, сыран пестикым, кыстыбайым, команмелнам, крабан чебурекым, Мӱндыр Эрвелысе рецепт почеш кальмар да краб дене шолтымо кол шӱрым, Карелийысе рецепт почеш форель дене шолтымо лаян кол шӱрым, арктический лимонадым, ир янлык шыл гыч ямдылыме тӱрлӧ кочкышым да эше шуко молымат тамлен ончаш кумылан-влак утларак йодыныт. Икманаш, фестивальыште кажне еҥлан элнан тӱрлӧ регионжын кочкышыж дене палыме лияш йӧн ышталтын. Тылеч посна фестиваль годым Марий Элысе район-влакын кудышт дене палдареныт. Кажне район уна-влакым национальный вургем, мурымаш да куштымаш дене вашлийын.
Палемдыде огеш лий вес шӧрынымат. Вет уремыште технологически неле кочкышым ямдылаш куштылгыжак огыл. Тидланже орва ӱмбалне пу дене олтымо ныл коҥгам, 9 казаным, 4 салмам (иктыжын диаметрже 1,5 метрыш шуын) келыштареныт. Уна-влак кочкышым ямдылымым шке шинчашт дене эскереныт.
«Йошка Еш» фестиваль Российын гастрономический туризмжым вияҥдымаште, национальный кочкыш дене палдарымаште кугу пашам шуктымыжым эше ик гана пеҥгыдемден. Тудо «Гастрономическая карта России» федеральный проект да Марий Элысе Правительствын полшымыж дене эртаралтеш.
Фестивальыште Удмуртий Республикын командыже национальный кочкышыжо – перпеч – дене сеҥен. Йошкар-Оласе «Тёплая речка» трактир ты мероприятийыште тӱнямбал рекордым шынден – 1111 подкогыльым тӱрлен. Марий калыкын кочкышыжым «Достояние нации» тӱнямбал реестрыште регистрироватлыме.
Иван Речкинын фотожо-влак.