Лÿмлö еҥ-влакым шарналтеныт

20 апрельыште С.Г.Чавайн лÿмеш Калыкле книгагудышто «Марий краевед» клубын погынымашыже лийын. Тудо писатель, педагог, мер пашаеҥ Шабдар Осыпын 125 ияш лӱмгечыжлан пӧлеклалтын.

Шабдар Осыпын произведенийже-влак марий литературын шӧртньӧ фондышкыжо пурат. Погынымашыште писательын илыш корныж нерген филологий шанче кандидат, Марий кугыжаныш университетын доцентше Галина Бояринова каласкален. Тылеч вара педагог-краевед, Марий Эл Республикысе образованийын сулло пашаеҥже, У Торъял район Овалже ял гыч Анатолий Тереховым шарналтеныт. Тыгак Татьяна Елькина тудын нерген «С любовью к Родине» шарнымаш сборникым ямдылен, ты книган презентацийже лийын.