Волжский район Тазалыкын тӱнямбал кечыжлан пӧлеклалтше «10000 шагов к жизни» акцийыш ушнен.
4 апрельыште 50 утла еҥ Карай школ гыч тӱҥалын, Кугу Олыкъял марте ошкылын. Тиде ялыште Совет Ушем Герой Зинон Прохоров шочын-кушкын. Тыштак Российын Геройжо лӱмым сулышо Валерий Иванов йоча пагытшым эртарен.
Акцийыш ушнышо-шамыч герой-влакын памятникышт воктелан пеледышым пыштеныт да З.В.Прохоров лӱмеш тоштер-пӧртыштӧ уна лийыныт.
Палемдена, «10 000 шагов к жизни» акций Тазалыкын тӱнямбал кечыжлан пӧлеклалтын да элнан кажне регионыштыжо эртаралтеш. Тений тудо кудымшо гана лийын.