Кодшо кечылаште Марий Элысе Правительствын заседанийыштыже республикыште капитально олмыктымо программым шуктымо шотышто каҥашеныт.
Ты программым ынде 11 ий илышыш шыҥдарат. Тудын дене келшышын, шуко пачашан 1118 пӧртым уэмдыме. Кызыт программын кумияш циклже (2023-2025) почеш сомыл шукталтеш. 176 пӧртым олмыктымо. 2025 ийыште эше 95 пӧртым тӧрлаш палемдыме, тидыже 315,3 тӱжем квадратный метрыш шуэш. Тений идалык мучаш марте 198 верым уэмдышаш улыт: инженерный сетьым, леведышым, лифтым, подвалым, фасадым.
Чылаже программышке 4028 пӧрт логалын. Тушто 475 тӱжем еҥ ила, тидыже республикыште илыше-влакын 70 процентше лиеш.
2026-2028 ийлаште олмыктымо паша планын проектше пале. Теве 2026 ийыште 91 пӧртым ачалаш палемдыме, тидлан 1,1 млрд теҥге ойыралтшаш.
Заседанийыште тыгак капитально олмыктымылан тарифым вашталтымым каҥашеныт. Ты сферыште пунчалым экономике ситуацийым ончен луктыт. А лектышыже пачер оза-влакын взносым шке жапыштыже тӱлымӧ деч шога. Такшым тиде паша сайынак шукталтеш: тений кандаш тылзыште оксам 97 процент еҥ тӱлен. Тидыже кундемыштына илыше-влакын мут кучышо улмышт да регионысо операторын тыршымышт нерген ойла.
Марий Элым Вуйлатыше Юрий Зайцев тиде программым да тушко тӧрлатымаш-влакым пуртымо шотышто каҥашаш Чоҥымо паша, архитектур да ЖКХ министерствылан Общественный палате ден депутат-влак дене пырля кӱштен.