6-шо №-ан исправительный колонийын паша адаптаций рӱдерышкыже ойыртемалтше заказ пурен. Шернур район Казанский селасе администраций теҥгылым, понарым, пеледыш-влаклан вазоным да урным ышташ йодын. Чыла тидым кӱчык жапыште шукташ кӱлын.
Федеральный программе почеш Казанский ял шотан илемлан окса пуалтын. Тушеч ик ужашым тӱвыра пӧрт ден Кугу Отечественный сарыште кредалше-влак лӱмеш шогалтыме памятник коклаште улшо Ленин садым тӱзаташ ойыреныт. Администраций дене кутырен келшымеке, 6-шо №-ан колоний тиде пашалан пижын. Ты заказым судитлалтше куд еҥ шуктен. Ленин садыште исправительный колонийын пашаеҥже да судитлалтше-влак тӱзатыме пашам ик кече жапыште ыштеныт. Колонийыште вес тыгай йодмашымат налаш ямде улыт.