12 апрельыште Марий АССР да РСФСР сымыктышын сулло пашаеҥже, композитор, дирижёр, педагог, мер пашаеҥ Н.А.Сидушкинын (1898-1975) шочмыжлан – 125 ий.
Нифонт Афанасьевич Всероссийкий хор обществын Марий пӧлкажым вуйлатен. Тудо шкем сай хормейстер, симфонический оркестрын уста дирижёржо да мастар скрипачше семын ончыктен. Композитор пашажым ончалаш гын, Нифонт Афанасьевич тӱрлӧ жанрыште пашам ыштен: мурым, романсым, спектакльлан музыкым возен.
1942-1944 ийлаште Марий филармонийым вуйлатен. 1944-1953 ийлаште Марий радиосо хорын художественный вуйлаышыже да дирижёржо лийын.
Струнный квартетлан «Марийская сюитым» возен. Лу йоча муро циклым ямдылен. Марий муро тӱняште кугу надырым пыштен.