31 июль гыч 3 август марте Марий Элыште пожарно-утарыше спорт дене Россий МЧС-ын Чемпионатше да Первенствыже эртаралтыныт. Тушко Российын тӱрлӧ регионжо гыч 25 команде ушнен: тӱнямбал чемпион, спорт мастер ден кӱкшӧ квалификациян моло спортсмен-влак таҥасеныт.
Икымше кечын
Таҥасымаш-влак Йошкар-Оласе «Дружба» стадионышто эртаралтыныт. 31 июльышто Калык-влакын келшымаш пӧртыштышт Россий МЧС системыште пожарно-спасательный спортым, поснак самырык-шамыч коклаште, вияҥдыме йодышым каҥашеныт. Вет спортын ты видше ончыкылык профессий шотышто кокытеланыше ӱдыр-рвезе-шамычлан чын корным ойыраш полша – спортсмен-шамыч кокла гыч шукынжо Россий МЧС системыште службым ойырен налыт.
Марий Элыште пожарно-утарыше спортын сайынак вияҥмыжым Россий МЧС-ын Угарман кундемысе тӱҥ управленийжым вуйлатыше В.Г.Синьков палемден да республикыште тыгай кӱкшытан таҥасымашым эртарыме дене саламлен.
А кастене мероприятийым торжественно почыныт. Тудын годым Марий Эл Правительстве Председательын икымше алмаштышыже Е.П.Кузьмин республикысе тулпатыр-влаклан у пожарно-утарыше техникыла деч сравочым кучыктен.
Ончаш толшо-шамычлан тӱрлӧ тематический площадкым ямдыленыт, пӧлек-влак модылтыныт. Мероприятийын талисманже – Маска – уна-влакын кумылыштым шке порылыкшо дене савырен.
1 август
Ты кечын Чемпионатлан келшышын, «Штурмовая лестница» дисциплиныште таҥасеныт. Первенствын спортсменже-шамычым «Полоса препятствий» вучен. Палемдыде ок лий: юниор-влак коклаште башньын кумшо пачашышкыже штурмовой тошкалтыш дене кӱзымӧ дене элыштына у рекордым (10,06 секунд) шындыме. Моско область гыч спортсмен Фёдор Фроловскийлан тидым ышташ йӱрат чарак лийын огыл.
«Штурмовая лестница» дисциплиныште (учебный башньын кокымшо пачашышкыже штурмовой башне дене кӱзаш кӱлын) чемпионко лӱмым Хант-Манси АО гыч Екатерина Чендакова налын. Пӧръеҥ-влак коклаште ты регион гычак Артём Хабибуллин чылаштым ончылтен.
2 август
Ты кече «Двоеборье» таҥасымаш гыч тӱҥалын. Спортсмен-влаклан 100 метр кужытышто тӱрлӧ чаракым эрташ, учебный башньыш штурмовой тошкалтыш дене кӱзаш кӱлын.
Кечываллан «Пожарный эстафетыште» таҥасеныт. Ты дисциплине 100 метр кужытан ныл ужаш гыч шога, эстафетный тоя олмеш – пожарный ствол. Икымше участник тошкалтыш дене пожарный пӧрт марте куржын мийышаш да тудын гоч эртышаш; кокымшо еҥ кок метр кӱкшытан савар гоч вончышаш да стволым кумшо участниклан кучыктышаш. Тудыжо пожарный рукав-влакым икте-весе дене ушышаш, вара – разветвлений дене. Тылеч вара нылымше спортсмен, огнетушительым налшаш да тулым йӧртышаш.
Пытартыш кече
3 августышто таҥасымаш-влакын пытартыш этапше, «Боевой развертываний», лийын.
Ты дисциплиныште ик эн тӱҥ спорт снаряд – мотопомпо. Тудын деч спортсмен-шамыч рукавым шупшыт да «пожарым» йӧрташ вӱдым колтат. Тыгай технике дене профессиональный да тыгак добровольный пожарный подразделений-влак пайдаланат. Ты дисциплиныште пӧръеҥ-влак коклаште икымше верыш Санкт-Петербургын командыже лектын.
Ныл кече эртаралтше таҥасымаш-влакым иктешлен, кастене «Дружба» стадионышто сеҥыше-шамычым палемденыт.
Россий МЧС-ын пожарно-утарыше спорт дене Российын чемпионжо-влак лӱмым Свердловск область гыч спортсмен-шамыч суленыт. Кокымшо верыште – Моско область гыч команде. Кумшо верым Хант-Манси АО-Югра гыч команде налын.
Первенствыште Моско область гыч ӱдыр-рвезе-шамыч эн тале лийыныт. Пермь край гыч команде кокымшо верыш лектын. Кумшо вер – Башкортостан Республикын.
Марий Эл Республикын чапшым индеш еҥан команде арален. Спортсмен-влак тылеч ончычат тӱрлӧ кӱкшытан таҥасымаште шке вийыштым тергеныт. Чемпионат да Первенстве годым нуно шке рекордыштым саемденыт. Но вес регионысо участник-влак нуным ончылтеныт. Туге гынат тулпатыр-влакын кумылышт волен огыл, мӧҥгешла, тиде ончыкыжым эртаралтше таҥасымаш-влаклан эшеат кыртмен ямдылалташ амалым ыштен.
Командын ик эн тале спортсменже – Максим Горохов. Йошкар-Оласе специализированный пожарный частьын мастер-пожарныйже. Пожарно-прикладной спорт дене спорт мастер, «Эн сай пожарный – 2018» республикысе конкурсышто сеҥыше. МЧС системе службышто – 2011 ий годсек.
– Пожарно-утарыше спортлан эше школышто тунеммем годымак шӱмаҥынам. Спортын ты видше капкылым шуара веле огыл, писылыклан туныкта, а тидыже профессиональный пожарныйлан моткоч кӱлешан. Ты профессий тыгак койыш-шоктышым пеҥгыдемда, – манеш тудо.
Чемпионат ден Первенствыште сеҥалтше уке манмат йоҥылыш ок лий. Вет тыгай кӱкшытан таҥасымашке логалмымат кажне спортсменын шкешотан сеҥымашыжлан шотлыман. А эн тале-влак 5-11 сентябрьыште Китайысе Харбин олаште шке вийыштым тергат – тушто Пожарно-утарыше спорт дене тӱнямбал чемпионат лиеш.
Фото-влакым Россий МЧС-ын Марий Элысе тӱҥ управленийжын пресс-службыжо пуэн.