Морко район Шордӱр ялыште шочын-кушшо Алексей Охотников специальный военный операций тӱҥалме икымше кечынак – тушто. Рвезе – 34-ше гвардейский мотострелковый бригадын сержантше. «Охота» позывноян марий салтак лӱддымылыкым да патырлыкым ончыктымыжлан II степенян «За храбрость» медаль да IV степенян Георгиевский ырес дене палемдалтын.
Патриот
Алексей шкенжым моктен але кугешнен ойлаш ок йӧрате. Чын пӧръеҥ семын элым йӧратымашыжым оҥым кырен огыл, а паша дене ончыкта.
Шордӱр школым тунем пытарымеке, А.Охотников армийыш каен. Хабаровскышто авиационный войскаште служитлен.
– Армий деч вара мӧҥгӧ толынам да ик жап тӱрлӧ пашам ыштенам. А 2016 ийыште военнослужащий лияш контрактым подписатленам. Карачаево- Черкессийыште служитленам. 2022 ийыште мемнам СВО кайыме верыш кусарышт. Ончыч водитель-механик лийынам, а 2023 ий годсек беспилотник дене пашам ыштем, – палдарыш салтак.
Лӱдат гынат, ончыко кайыман
«Охота» командыж дене Днепр гоч Николаев ола марте шуын, лач Николаевыште тунам чот «шокшо» лийын. Алексей каласкала:
– Колонно дене кайыме. Украина мландыш логалмеке, лӱдмаш лийын огыл. Но кунам ик бригадым ик верыш колтышт, кокымшым – вес верыш, тунам йӧсылыкым шижаш тӱҥалме, чон чон олмышто лийын огыл. Вара Николаев олаште шучко ыле. Тушто ме обороно линийым ыштенна. Мемнан рото разведдозор семын эн ончыч чыла эскерен, тушманын «кӧргышкыжӧ» пурен коштын. Кумшо мартыште тушто подрывыш логалме. Шукын нелын сусыргеныт, коленыт. Вара Херсоныш пурымо. Тушто обороно линийым ныл тылзе наре кучымеке, мемнам угыч вес верыш колтеныт. Мо оҥайже, шошо пагытыште шукыж годым эре черланенам. А тунам ик еҥат вирусым пижыктен огыл. Ала адреналинлан кӧра, ала эше иктаж амал лийын.
Айдеме чылалан тунемеш. Йӧсӧ, йолташ-шамычын сусыргымыштым колымыштым ужаш, кажне кечын пуля шӱшка, коптер-влак чоҥештылыт. Эркын тидланат тунем шумо.
Херсонышто шучкылык ончылно шеҥгек чакнен омыл. Сусыргышо салтакымат шӱдырен луктынам, разведкышкат коштынам, пырля служитлыше йолташем-влак дене мемнан ваштареш кредалше еҥым пленышкат налме.
Херсон деч вара марий салтак Запорожьеш логалеш. А вара южнодонецкий направленийыш колтат. Тушто руш войска обороным кучен. Икмыняр жап гыч «Охотын» командыжым Белгородыш, вара Курск могырыш колтеныт. Кызыт Белгородысо Поповка ял воктене верланеныт.
– Украина мландыште лийме годым калык тӱрлын вашлийын. Кугурак ийготан-влак мемнан деке осал койышым ончыктен огытыл, а теве самырык-шамыч – утларакшым мӧҥгешла. Но ӱшан, конешне, иктыланат уке, эре тӱткӧ лийман.
Неле ситуаций годым шкем ласкан кучаш кӱлеш, ӧрткыман огыл. Воктене лӱдшӧ салтак уло гын, шкежат шиждымын лӱдаш тӱҥалат. Да шучко, но тыгай годым поснак пеҥгыде койыш-шоктышым ончыктыман, – манеш СВО-н участникше.
Сеҥымаш дене вучена
Алексейым мӧҥгыштыжӧ ача-аваже, родо-тукымжо, лишыл еҥже-влак вучат. Кажныжлан тудо шерге да йӧратыме. Лишыл йолташыже Авенир Ефремоват – кызыт СВО-што. Кум ий ваш ужын огытыл, но интернет полшымо дене кылым кажне кечын кучат, вашла полшен шогат. Авенир йолташыже ойла:
– Алёш шоляшем дене Шордӱр ялысе ик уремыште кушкынна. Йоча пагытна пырля эртен. Кугурак лиймекат, иктаж-могай нелылык дене тӱкненна гын, вашла каҥашым йодын, чыла проблемым пырля решатленна. Сӱаныштемат Алексей свидетель лийын. Тудо СВО-што контракт почеш служитла, а мый мобилизаций почеш тыште улам. Отпускна ик ганат пырля логалын огыл, но вашкылна туге гынат уло. Кертме семын эре йыҥгыртена.
Теве тыгай марий патыр «Охота»: лӱддымӧ, виян да чын йолташ.
Еш альбом гыч налме фото. Алексей шолаште