Йошкар-Олаште у проект илышыш шыҥдаралтеш. Тӱҥ режиссёр Максим Брызгалов шке виян командыж дене марий тӱня дене кылдалтше «Матч Акпарса» ончыкылык фильмлан тизерым войзен. Тидлан марий актёр Акпарс Иванов лӱмын коньки дене сайын кошташ тунемын.
7-8 апрельыште ЙошкарОлаште «Марий Эл» ий полатыште съёмко паша «шолын». Тушто ончыкылык фильмлан эн тӱҥ кадр-влакым войзеныт. Тӱҥ герой-влакым М.Шкетан лӱмеш Марий драмтеатрын актёржо-влак Акпарс Иванов ден Наталья Алексеева, Г.Константинов лӱмеш Руш академический драмтеатрын актёржо Юрий Синьковский да актёр Денис Шаблий модыныт.
ОҤАЙ ЛИЙШАШ
Сюжет почеш «Акпарс» хоккей командын клубшо окса шотышто нелылык дене тӱкна. Тугаев фамилиян капитан пелашыж дене ойырлымашке шуэш. Тӱҥ матч деч ончыч тренировко годым Тугаевын вуйышкыжо шайбе толын перна, да тудо 500 ий ончычсо пагытыш логалеш.
Тушто спортсмен Акпарс марий патыр дене палыме лиеш. Ала-кунам Акпарсат ватыжым йомдарен. Тиде событий шкенжын да калыкын пӱрымашыштым вашталташ йӧным ыштен. Марий патыр дене мутланымаш спортсменым ик корным ойырен налаш кумылаҥда. Тидыже Акпарсымат ӧрыктара.
ИСТОРИЙ ДЕНЕ КЫЛДЕНЫТ
Сюжет шочмо нерген тӱҥ режиссёр Максим Брызгалов тыгерак ойла:
– Сюжетым возымо деч ончыч мый Аркадий Крупняковын «Гусляры» трилогийже гыч «Марш Акпарса» повестьым лудынам. Тыгак Волжск олаште «Ариада Акпарс» хоккей клуб лийын. Тудо 12-13 ий ончыч кугу таҥасымаште сеҥен. Сандене нине событийвлак сюжетым шочыктымаште полшеныт.
Но мондыман огыл, мемнан фильмна художественный, сандене интерпретаций-влак пурталтыныт. Тыгак 500 ий ончыч лийше историйлан тӱткыш ойыралтын.
Тӱҥ геройым, Тугаевым, Акпарс Иванов модеш. Ме тудын дене ончычак пырля пашам ыштенна, Акпарс шкенжым сай актёр семын ончыктен. Пелашыжым Наталья Алексеева модеш. Ожно илыше марий патырын рольжым Денис Шаблийлан ӱшаненна, а Юрий Синьковский «Сапфир» конкурент командын еҥжын образшым чоҥен.
Тизерыште тыгак кином йӧратыше, кумылан еҥ-влак сниматлалтыныт.
– Марий Элысе Спорт да туризм министерстве, Марий Элысе спорт сооруженийын управленийже да «Шаблий» киностудий полшымо дене ты паша вораҥын. Мыланна болельщик-влак трибуным сниматлаш кӱлын, сандене войзалташ кумылан-влакым ӱжынна. Тыге 540 еҥ погынен. Сниматлыме годым моткоч поро да куанле шӱлыш озаланен.
Тыгак Йошкар-Оласе кок хоккей командын да арбитрвлакын тӱшка пашаш ушнымышт сай лектышым конден, – палдара продюсер Юлия Шадрина.
НЕЛЫЛЫК ДЕНЕ ТӰКНЕНЫТ
Кажне паша нелылыкым луктеш. Тидын шотышто художник-постановщик Артём Готовцев ойла:
– Ме кугу площадкыште пашам ыштенна, сандене тудым моторын, художественно почын пуаш манын, кугу форматан реквизит-влак (баннер) ышталтыныт. Тыгак марий патырын образше собирательный, могай тудо лийшаш – посна правил уке. Сандене, тыгай образым мыланем ышташ темлымеке, сӱретче-влакын иллюстрацийыштым шымленам. Мо лектын, тудым кадрыште ужын кертыда.
Организатор-влак палемдат: тиде тизерлан марий композитор Григорий Архипов лӱмын семым келыштара. Ямде тизерым майыште ужаш лиеш. Вара тудым конкурсыш колтат да иже фильмын пӱрымашыже пале лиеш.
М.Шкетан лӱмеш Марий драмтеатрын актёржо Акпарс Иванов шке рольжо нерген тыге ойла:
– Республикыштына кажне кечын фильмым огыт сниматле, да ты командым мый сайын палем, сандене войзалташ кумылаҥынам. Нелылык технический ужаш дене кылдалтын. Мый вет хоккеист омыл, а мыланем коньки ӱмбалне сайын шогыман да шке задачым мучаш марте кӱлын шуктыман.
Герой нерген иктым гына ойлен кертам: тудо личность семын кушмо корнышто шога, кызыт шке койышыжым вияда веле. Тудлан чын корным ойырен налашыже логалеш.
Комментаторын рольжым модшо Михаил Королёв каласкала:
– Мыйын персонажем матчым эн кульминационный моментыштыже комментироватла, тидын дене конфликтым келгемда. Илышыштем профессиональный комментаторлан ыштыме опытем лийын, сандене кунам Максим мыйым сниматлалташ ӱжын, вигак келшенам. Паша куштылгын эртен, вет персонаж мыланем лишыл. Ӱшанем, шке задачемым сайын да чын шуктенам.
Мый палем, ончымеке, кажне еҥ шкалан келшыше иктешлымашым ышта, но тӱҥжӧ: шонымет шукталт кертеш манын ӱшанаш кӱлеш, тидлан ончыко каяш гына ит ӧркане.
М.Шкетан лӱмеш Марий драмтеатрын актрисыже Наталья Алексеева шке рольжо нерген тыге палдара:
– Мый кеч-могай творческий пашам вияҥдаш полшаш кумылан улам. Кеч киношто икымше гана огыл сниматлалтам, туге гынат тиде – сай опыт. Тыгай съёмко марий тӱвыра нерген каласкала, марий патыр дене ончышо-влакым палдара. Тыгак еш пиал нерген шонаш тарата.
Дарья БЫКОВА.
И.Речкинын фотожо-влак.