Пошкырт кундем Калтаса селаште регион-влак кокласе «Ший кандыра – 2025» эрвелмарий калык куштымаш фестиваль-конкурс луымшо гана эртаралтын. Тудо Калтаса районын 95 ияш лӱмгечыжлан пӧлеклалтын. Тушко кумло наре усталык коллектив ушнен. Нуно Пошкырт, Марий Эл, Татарстан республикла, Свердловск кундем гыч миеныт.
Фестивальыш ушнышо усталык коллектив-влак марий куштымашын тӱрлӧ шӧрынжым мастарын почын ончыктеныт. А жюри ансамбль-шамычым йоча, сценысе да илыш-йӱла дене кылдалтше номинацийлаште аклен. Тӱҥ шотышто коллектив-влакын йӱлам, мастарлыкым, образым почын моштымыштым, музыкальный да художественный оформленийыштым шотыш налын онченыт.
«Ший кандыра» фестиваль – кумда тӱням марий куштымаш дене сӧрастарыше мероприятий, манаш лиеш. Вет ты фестиваль, чынжымак, куштымашын поянлыкшым еҥ-влак коклаште шаркалаш да арален кодаш полша. Садланак кугу тӱткыш самырык тукымлан ойыралтеш. Йоча коллектив-влак калык куштымашлан шӱман улмыштым ты мероприятийыште пеҥгыдемденыт. Нуно тидлан чот ямдылалтыныт.
Тамара Дмитриеван лӱмжым нумалше мурышо да куштышо «Эрвел марий» калык ансамбль «Ший кандыра – 2025» фестиваль-конкурсын Гран-прижым сулен. Вуйлатышыже – Борис Дмитриев.
Организатор-влакын палемдымышт почеш, ты фестиваль – марий тӱвырам йӧратыше да аклыше-шамычым иквереш чумырышо пайрем. Уста еҥ-влакын тыгай вашлиймаш деч вара у пашам вораҥдараш, у кӱкшытыш шуаш кумылышт шочеш.
«Калтасинская заря» ВК-се тӱшка гыч налме фото-влак