Алексей П. Йошкар-Олаште шочын-кушкын. Кызыт тудо 25 ияш. Школ пагытыште черкыш коштын, ик службымат коден огыл, манаш лиеш. Кушкын шуын, троллейбусым виктараш шонен. Но кызыт рвезе кӱртньывоштыран кӱкшӱ пырдыж коклаште РФ Уголовный кодексын 228-ше статьяж почеш («Незаконное приобретение, хранение, перевозка, изготовление, переработка наркотических средств, психотропных веществ или их аналогов») срокым эрта.
«Чын верч шогышо, черкыш коштшо айдеме кузе решотка коклаш логалын кертын?» йодышлан Алексей тыге вашештыш: «Ик жап Юмылан ӱшанымым чарненам ыле. Очыни, тидлан кӧра тыште улам».
Тыгай ситуацийыш логалше шуко еҥ гаяк рвезылан куштылгын толшо окса кӱлын. Ятыр ӱдыр-рвезе «кугу» пашадарым сӧрымӧ дене аҥырга. Вес амалже – еҥ ончылно, йолташ-влак коклаште ойыртемалташ шонен, но модыш гыч лодыш лектын.
2017 ийыште Алексейым наркотик веществам шаркалымыж годым кученыт да «мӧҥгысӧ арестыш» петыреныт. А суд лиймеке, СИЗО-ш, вара исправительный колонийыш колтеныт. Колонийыште рвезе ынде идалык утла шинча. «Тыште мый тӱрлӧ книгам лудам. Нунын кокла гыч иктыже психологий темылан лийын. Тушто ик ужашыштыже преступленийым ыштыме нерген возымо ыле. Преступленийым ыштымаш айдемым ӱлык шупшеш. Сандене тыгай куштылго паша нерген шонкалыше еҥым тиде шонымаш деч кораҥаш йодам. Жапдам тунеммашлан, ушакылым пойдарымашлан ойырыза. Но осал пашам ида ыште», – ойла рвезе.
– Преступленийым ыштыме нерген ешыштет пален налмекышт, мом ойленыт?
– Тыгай пашам ыштымемлан ача-авам ончылно йӧндымӧ лийын. Туге гынат нуно мыйым умыленыт, вурсен, мыскылен огытыл. Кертмышт семын полшен шогат, пӧртылмем вучат.
Алексейлан колонийыште эше куд ийым эртарыман. Шкем сайын кучымыжлан, йоҥылышыжым умылымыжлан жап деч ондак мӧҥгӧ колтат манын, рвезе ӱшана.
Марий Элысе исправительный колонийлаште 2149 еҥ срокым шукта. Нунын кокла гыч 520 еҥже – УК-н 228-ше ста- тьяже почеш.