Куржталын, вийым налеш

Марий Турек район Арбор кундемын эргыже Вячеслав Демьянов йоча годсек спортлан шӱман. Тудо школышто тунеммыж годымак спортивный туризм дене заниматлаш тӱҥалын. Кызыт спортын ты видше дене Марий Элын командыштыже таҥаса. Тиддеч посна 20 ияш рвезе ече дене писын коштеш, футболла талын модеш.

ПИСЕ

Слава Арбор кундемышке пурышо Лÿсэҥер ялыште шочын-кушкын. 1-9-ше классла марте Лоп, вара Кугу Карлыган школлаште тунемын. Рвезе изинек писын куржталышташ, стадионышто футболла модаш йӧратен. Но эн чот тудлан спортивный туризм келшен. Вячеславын кугурак Надя акажат спортын ты видше дене заниматлен. Арбор школышто спортивный туризм дене кылдалтше кружок лийын. Рвезе тушко кошташ тӱҥалын.

«8-9-ше класслаште спорт дене поснак чот заниматленам. Арбор школышто ты кружокым тренер Людмила Николаевна Семёнова вÿден. Ме тÿрлö вере таҥасенна. Вара мыйым туризм дене Марий Элын сборныйышкыжо ÿжыч», – каласкала рвезе.

МАРИЙ ЭЛ СБОРНЫЙЫН УЧАСТНИКШЕ

Рвезе – тачысе кече марте ты командын членже. Школышто тунеммыж годымак тушко сборыш ик арнялан коштын. Йошкар-Олашке Волгатехын Чоҥымо паша да архитектур институтышкыжо тунемаш толмеке, кажне кечын тренировкыш вашка. Кызыт нылымше курсышко вончен.

Спортивный туризмыште писын куржталыштман, пÿсö ушакылан лийман. Марий Элын сборныйыштыжо Вячеслав шукылан тунемын, команде дене Российын тÿрлö верлашкыже таҥасаш коштын.

«Тÿҥ сборныйышто 16 еҥ (8 ÿдыр, 8 эрге) улына. Шукынжо тышке Йошкар-Ола гыч коштыт. Тренировко-влак «Роза ветров», «Азимут» самырык-влакын рÿдерыштышт лиедат. Кок тренер занятийым эртара. Могай тактикым шонаш, кузе куржаш, туныктат. Спортивный туризмыште тÿрлö дистанцийыш куржталына, тышке шке семын, команде дене куржмым пуртыман. Йолешке, ече туризм улыт. Сандене телым ече дене коштына. Спортивный туризмлан келшыше ӱзгарым налына, мутлан, карабин-влакым сакена, каскым чиена. Спортын ты видше куштылгын огеш пуалт. Нелылыкат шуко лектын. Тидыже вес командылан сеҥалтме годым шижалтеш. Тунам кумыл вола гынат, эше чот заниматлыме шуэш. Кодшо ийын Марий Элыште спортивный туризмым спортын базовый видшылан пеҥгыдемденыт. Шуко грантым сеҥен налме. Моско, Самара, Владимир, Санкт-Петербург олалаш, Беларусийыш таҥасаш коштынна. Команде дене эре ончыл верлашке лектынна. Икана Москошто эртаралтше таҥасымаште личный первенствыште 3-шо верым налынам», – ойла В.Демьянов.

 КРОСС, ФУТБОЛ

Вячеслав кросслаштат таҥаса. Кодшо ийын республикысе «Нацийын кроссшо» соревнованийыште 3-шо вер дене палемдалтын. Вузышто эртаралтше таҥасымаште институтын чапшым арала. Телым ече дене кошташ йöрата, тÿрлö ориентированийыште участвоватла.

В.Демьянов 9-ше класс гыч Арбор ялысе футбол командыште модеш. Рвезын мутшо почеш, тушко тÿрлö ийготан еҥ-влак коштыт. Эн кугу ийготан 30 ийым эртыше-влак улыт, эн изи – школышто тунемше-влак.

 «Районышто ме эре ончыл верлам сеҥен налынна. Кужэҥер, Шернур, Параньга районлашке турнир дене миен коштынна. Теве тений Татарстан кундем Балтаси районышко модаш кайышаш улына ыле, но коронавируслан кöра турнир ыш лий», – ойла В.Демьянов.

Вячеславлан спорт – чоныш ласкалыкым пуртышо, кумылым нӧлтышӧ сомыл. Вет тидлан тудо шуко жапым ойыра. Ялышке канышлан толмыж годымат куржталыштеш. Тыге куатым, вийым налеш. Сандене ончыкыжымат илышыжым спорт дене кылдаш шона. Магистратурышко спорт направлений дене тунемаш пураш кумылжо уло.

Тек рвезе кугу сеҥымашке шуэш, волгыдо шонымашыже шукталт толеш!

Демьяновын альбомжо гыч налме фото.