Купсолаште казак-влак «кредалыныт»

19-20 сентябрьыште Волжский район Купсоласе   Юмым шочыктышо эн святой Аван леведмыж лӱмеш Храм пелен «Покровский – 2020» регионысо II военно-полевой учений лийын. Тушто Кугу Отечественный сарыште лийше кредалмашын реконструкцийжым ончыктеныт.

Тиде мероприятий  Волжский район Кугу Олыкъялын эргыже, Совет Ушем Герой Зинон Филиппович Прохоровым шарнымылан пӧлеклалтын. З.Прохоров 76 ий ончыч, 1944 ий 19 сентябрьыште, героический подвигым ыштен – капше дене амбразурым петырен.

Военно-полевой погынымашыш тӱрлӧ регионла гыч казак группо-влак толыныт: «Вятка» (Киров ола), Татарстан республикысе РО СКВРиЗ (Озаҥ ола), «Алметьевский» ОКВ отдел (Алметьевск ола, Татарстан), «Хутор Боровецкий» БКО ТОКО ВВКО (Набережный      Челна ола), «Хутор Волжский» (Волжск ола), «Хутор Казанский» (Озаҥ ола), «Хутор Никольский» ХКО (Канаш ола, Чуваший), «Хутор Бирский» (Башкортостан), «Хутор Архангельский» (Зеленодольск ола, Татарстан), «Хутор Покровский» (Купсола, Волжский район).

Мероприятийын икымше кечынже Моско ола гыч Российысе казачествым вияҥдыме  шотышто «Союз Казаков-Воинов России и Зарубежья» мер организацийын Верховный Атаманже Николай Леонидович Дьяконов миен.  «Таче ме элыштына эн ончылно кайыше казачий организаций улына. Мемнан деке Российысе 78 регион да вес элысе 45 общине ушнен. Ме Российысе Обороно министерствылан резервым ямдылена, да шке эллан служитлаш ямде улына», – каласен тудо.

Атаман-влакын каҥашымашышт деч вара полевой лагерьыште икмыняр дисциплине дене учений-влак тӱҥалыныт: ТСП, изирак мобильный группо-влакын пашашт, оралтым утарен налмаш, боевой щит-влак дене паша, медицинский ямдылалтмаш, тактический ориентирований, альпинистский ямдылалтмаш.

Мероприятийын кокымшо кечынже изирак группо-влакын практический занятийышт чодыраште эртен.

Таҥасымаште лийше участник-влакын ойлымышт почеш, сбор пеш сайын, пайдалын эртен. Кок кече жапыште нунылан полевой кухньышто шокшо кочкышым ямдыленыт.

Тений элна Кугу Отечественный сарыште сеҥымылан 75 ий теммым палемден. Сандене тиде мероприятийым сар жапыште неле-йӧсым чытен, сеҥен лекше, героический подвигым ыштыше калыкым шарныме лӱмеш эртарыме.