28 октябрьыште Правительстве пӧртыштӧ Россий Федераций Советын сенаторжо-влак Константин Косачёв ден Сергей Мартынов Марий Элысе самырык герой-влаклан наградым кучыктеныт.
Федераций Совет председательын алмаштышыжын таумутшым 17 ияш Вячеслав Акимов сулен. Тудо Волжск оласе Россий Герой В.Иванов лӱмеш 2-шо номеран школышто 11- ше классыште тунемеш. Тений 9 май кечын рвезе ола воктенысе чодыраште ылыжаш тӱҥалше тулым ужын. Вячеслав тидым пожарный-влаклан увертарен, а нунын толмешкышт, йолташыж дене коктын икмыняр жап зиян ваштареш шогеныт, тулым чактареныт. Рвезе-влакын лӱддымӧ улмыштлан кӧра чодырам пожар деч арален кодымо.
«За проявленное мужество» медаль дене ЙошкарОласе А.С.Пушкин лӱмеш 4-ше номеран гимназийыште 9-ше классыште тунемше Александр Егоров палемдалтын. Тудо 10 июльышто Изи Какшан эҥерыш пуреҥгаяш тӱҥалше шке таҥаш кок ӱдырым утарен. Тыгай награде-влак ий еда ятыр самырык еҥлан пуалтыт. Сенатор-влак тыгай лӱддымӧ, патыр икшыве-шамыч элыштына шагал огытыл манын палемденыт. Нуно йоча-влакым ончен куштымаште ача-ава-влакын суапышт нерген ойленыт, ты ганат посна таумутым Александр да Вячеславын ача-аваштлан каласеныт.
