Тыге моктен мура Оршанке район шочмо Кугунур кундемым Марий Элыште палыме «Какшан сем» фольлор ансамбль. Кызыт коллектив калык лӱмым налаш йодмашым пуэн.
90 ияш историй
– Такшым ончыч ансамбльна «Какшан сер» лӱман лийын. Тудлан негызым уста туныктышо да Совет Ушем Герой Николай Сергеевич Рябинин эше 1935 ийыште пыштен. Варажым музык коллективым Василий Филиппович Рыбаков вуйлатен. Тудын тыршымыжлан кӧра «Какшан сер» ансамбль Москошто эртаралтше калык усталык Всесоюзный радиофестивальыште участвоватлен да кокымшо верым сеҥен налын, – палдара «Какшан семын» вуйлатышыже Жанна Владимировна Смирнова.
Ансамбльын 90 ияш историйжыштыже тӱрлыжат лиеден. Тиде жапыште ятыр вуйлатыше да участник вашталтыныт. Шуко конкурс, фестиваль, эсогыл тора кундемыш гастроль лиеден. Ансамбльын лӱмжат весемын. У составан да у сынан «Какшан сем» фольклор ансамбль 1994 ий октябрьыште Кугунур тӱвыра пӧрт пелен шочын. Коллективым тунам Жанна Владимировна чумырен.
Калык мурымат мурат, шкеат возат
– Оршанке район марий-влакын семышт молын деч ойыртемалтеш. Репертуарна поян. Утларакшым кундемнан мурыжым мурена, куштымашыжым да йӱлажым ончыктена. Тылеч посна авторский муро-влакым йоҥгалтена. Мутым Римма Алексеевна Кудрявцева воза, а семым Елена Сергеевна Рыбакова келыштара. Кызытсе саман дене тӧр каяш тыршена. Мурыланна фонограммым, аранжировкым ыштена. Коллективна изижак огыл, ончыч, конешне, шукынрак лийме. Кызыт тӱрлӧ ийготан 12 еҥ улына. Тӱмыр сем почеш мурена, куштена, Оршанке марий койышнам ончыктена, – каласкала Жанна Смирнова.
Коллектив Марий Элысе чыла районлаште да олаште мастарлыкшым ончыктен. Концерт дене Пошкырт кундемыште, Угарман да Киров областьлаште, Мордовий, Удмуртий, Чуваший, Татарстан Республиклаште, эсогыл Эстонийыште выступатлен. Тӱрлӧ кӱкшытан конкурсышто лийын да эре манме гаяк сеҥыше радамыш логалын. Мутлан, шукерте огыл ансамбль Оршанке район Тошто Крешын ялыште Арсий ден Евгений Волковмытын усталыкыштлан пӧлеклалтше «Эҥер вӱд ӱмбалне» фестиваль-конкурсыш ушнен да II степенян диплом дене палемдалтын.
Ургыктат
«Какшан сем» ансамбльын участникше-влак Оршанке кундемын семжым веле огыл йоҥгалтарат. Тылеч посна районын ойыртемжым вургемыштат ончыктат. Шке оксашт дене кызытсе саманлан келшыше 11 сценысе тувырым, ончылсакышым да шовычым ургыктеныт. 1940-ше ийысе сынан костюм-влакым ямдыленыт. Пӧръеҥ тувырым, Пошкырт марий-влакын костюмыштым, вуйыш такиям, одо марий-влакын костюмыштым ургыктеныт.
Усталык аланыште «Какшан сем» ансамбль вержым шукертак муын. Коллективым палат, концертлаш чӱчкыдын ӱжыт. Шке районысо семышт дене кумылым нӧлтат. Марий тӱвыранам эшеат пойдарат.
Ансамбльын архивше гыч налме фото.