Виче кундем Пижанью район Кыдал Лаштык ялыште шочшо Елена Шаблакован чонжо кугурак эргыж верч чот тургыжлана. Марий ӱдырамаш спецопераций кайыме верлашке 100 утла гана миен толын. Эн ончыч Ярослав эргыжым кычалын, а кызыт салтак-шамычлан гуманитарный полышым наҥгаяш полша.
Икмыняр ий ончыч Елена, Ярик ден Данила эргыже-влакым налын, шочмо кундемже гыч торашке лектын кудалын. Кокымшо гана Ростов кундемыш марлан лектын. Кирилл эргышт шочын. Но тыгодымат Елена пелашыжын ӱшанжым йомдарен да Йошкар-Олашке илаш куснен. 22 ияш Данила эргыже Росовешак илаш кодын. Кызыт тудо еҥ-влаклан сатум кондыштарыше ик службышто пашам ышта.
А Ростов областьыште илымыж годым 2022 ий 3 октябрьыште колышылан шотлалтше Ярослав эргыж (Ярослав Исаков, позывнойжо – «Топаз») нерген пален налаш, тудым кычалаш кажне каныш кечын коштын. Но капшым муын огыл. Пырля служитлыше йолташыже-влакын ужмышт почеш, Ярослав ӱмбаке снаряд логалын, каске чоҥештен да вуйжо пӱчкылтын.
Варажым эргыж гаяк салтак-шамычлан, нунын родо-тукымыштлан полшаш тӱҥалын. Елена деч шке шочшыштым муаш ятыр еҥ йодын. Марий Эл гычат вич боецым муын, тышеч кумытшо вуйым пыштеныт. Марий ӱдырамаш госпитальлашке коштын, а вара нунылан кертмыж семын полшен. Тылеч вара мумо салтак-шамычлан ончыкыжымат полшышт манын, саде ола гыч волонтёр-влакым кычалын.
– Икымше гана госпитальыш кайымем годым ныл ият пелаш Кирилл эргымым нигуш кодаш ӧрынам да пеленем налынам. Тунам мыланна 10-шо номеран палатыште эмлалтше салтак деке пураш кӱлын. А ме эмлымверын пачашышкыже вес могырым логалынна. Икымше палатыш пурымеке, койкышто гына огыл, кӱварвалнат киддыме-йолдымо салтак-влакым ужмеке, ик мутымат ойлен кертын омыл. Тыгодым тыгай изи пачката эргым палатыш пурен да каласен: «Главное вы живы и вы вернётесь домой». А мыйын шинча йырем шинчавӱд налын, кузе тидым ончыкташ огыл манын, чуриемым шылтем…
Варажым Кирилл луымшо палатыш шумо марте кажне палатыш пурен, нине шомак-влакым ойлен. Изи йоча, витне, мыйын ойлымемым шарнен кодын улмаш. Тылеч вара тудым эре гаяк коштыктенам. Танкист-влак дене ик гана лийын. Курск областьыште илыше тунемше, флагым погышо Сергей денат кок гана мийымыж годым кутырен, – каласкала аваже.
Тыге изирак эргыжат салтак-шамычлан полшаш тӱҥалын. Эн ончычшо фронтышко сӱрет-влакым сӧрастарен намиеден. Сандене боец-шамыч тудлан «Художник» позывнойым пуэныт. Тыгак сосискан когыльым шкеак ыштен, тыгодым аважлан полшашат чарен.
Кызыт 7 ияш Кирилл Обвинцев йочасадысе выпускной деч вара школыш каяш ямдылалтеш. Но койышыж дене ончылгочак кугемын. Ик мероприятийыште тудо ыш выступатле гын, весыште чолган гына рушла йодо: «Колыштыда мо мыйын почеламутемым?» «Да» мутым колмеке, «Понятно» малдале да Сеҥымаш нерген ныл корным шергылтарен ойлыш. Тунам уло капемлан копыж-ж чучо. Очыни, вашлиймашке толшо кажне еҥын шӱм-чонжым тарватыш…
Кугурак эргыже, Ярослав Исаков, 2022 ий 30 августышто контрактым подписатлен да 1 сентябрьыште заданийым шукташ каен. 1 октябрьыште Ярослав 23 ийым темен. Ты кечын аваж дене пытартыш гына кутырен. Россий салтакым Патырлык орден дене колымекыже палемденыт.
Кок патырле эрган аван чонжо коржеш гынат, тидым ок ончыкто, тушто поро кумыл гына озалана. Вес еҥлан полшен кертмыж дене марий ӱдырамаш ласкалыкым муэш.
Эльвира Терентьева.