Таче, 4 сентябрьыште, Марий Элы Республикысе изберком председатель И.Татаринова шушаш сайлымаш шотышто пресс-подходым эртарен.
6, 7, 8 сентябрьыште кундемыштына 494 сайлымаш участкым йӱклаш келыштарыме. Нуно 8 гыч 20 шагат марте пашам ыштат.
Йӱклымашын единый кечынже Марий Элыште илыше-влак ик мандатан округышто кугыжаныш погыныш кандидатым, партичный списке почеш кугыжаныш погыныш кандидатым да депутат-влакын верысе погынамашышышт кандидатым ойырен налыт. Республикысе Кугыжаныш Погыныш 52 депутатым да муниципал образованийысе органлаш – 1301 депутатым.
Кажне сайлыше еҥлан 3 бюллетень пуалтеш. Тудо Кугыжаныш Погынын ик мандатан округшын, списке почеш да верысе собранийын депутатшын кандидатшым ойырымо верч йӱклышаш. Сайлаш участкыш толаш, мӧҥгӧ комиссийым ӱжыкташ але дистанционно (ДЭГ) лиеш. Пытартыш йӧн дене кундемыштына икымше гана пайдаланат. Тачысе кечылан 53497 избиратель электронно йӱклаш йодмашым пуэн. Тыге сайлыше еҥ мӧҥгӧ гыч лекде йӱклымашке ушнен кертеш. Тидлан 6-8 сентябрьыште 8 гыч 20 шагат марте vybory.gov.ru сайтыш пурыман да кандидатым ойырыман.
Кугыжаныш Погынын депутат-влакым сайлаш 1049600 бюллетеньым ямдылыме гын, муниципал органлаш – 524579 бюллетеньым. Сайлымаш сайын эртыже манын, 483 участкыште видеорегистратор-влакым вераҥдыме, 99 участкыште – КОИБ-ым. Икмыняр участкыште инвалид-влаклан сурдопереводчик да трафарет-шамыч лийыт. Сайлымаште МВД пашаеҥ-влак дежуритлаш тӱҥалыт.
Марий Элыште илыше кажне еҥым сайлымашке ушнаш ӱжына!